Ministru Justisa, Manuel Cárceres da Costa. Imajen/Antonio Goncalves

DILI, 04 novembru 2019 (TATOLI)- Iha programa polítika Orsamentu Jerál Estadu (OJE) tinan fiskál 2020 nian, Ministériu Justisa (MJ) mantein programa prioridade rua, mak hanesan  hadi’a jestaun institusionál no boa governasaun.

Liuhosi audiénsia ho Komisaun A Parlamentu Nasionál (PN) ba asuntu Justisa no Konstitusionál, ohin, iha sala audiénsia komisaun A nian, Ministru Justisa, Manuel Cárceres da Costa, husu ba PN atu konsidera proposta no programa MJ nian ba tinan 2020 ne’ebé ministériu hakarak atinje.

“Planu prioridade ministériu nian laiha buat foun, katak nafatin iha  baze prioridade rua  mak kontinua   hadi’a no hatutan iha tinan hirak liu ba lao ona hanesan jestaun institusionál  ho boa governasaun,” esplika Ministru Justisa Manuel Cárceres da Costa, hodi responde Ajénsia TATOLI.

Nia esklarese tan, baze prioridade nee iha komponente hotu englobe iha laran hanesan ko’alia kona-ba iha parte kapasitasaun rekursu umanu, fornese presaun servisu públiku hanesan Diresaun Terras Propriedade, ho Diresaun Notariadu, oinsá atu hakbesik servisu públiku di’ak ba populasaun.

Presidente Komisaun A, Carmelita Caetano Moniz, louva servisu Ministériu Justisa nian ne’ebé ezekuta ona OJE 2019 nian to’o 70%  mezmu   iha kategoria balun mak Ministériu Justisa la konsege ezekuta tanba problema tékniku.

Deputada Carmelita Moniz hateten, MJ husu aumenta tan montante ne’ebé agora Komisaun A sei tetu hodi haree katak ezekusaun orsamentu mínimu loos no aumenta ne’e realístiku ka lae.

Iha orsamentu 2019 ne’ebé aloka ba  Ministériu Justisa tuir portal transparénsia nian katak orsamentu orijen $21,982,783.00, kompromisu $2,685,644.23, obrigasaun sira $747,593.27, atuál $13,738,761.82, saldu $4,810,783.68 no to’o ohin ezekusaun atinje to’o 65.9%

Proposta orsamentu 2020 ba Ministériu Justisa hamutuk Millau $22-resin atu aloka ba saláriu vensimentu, bens servisu no kapitál menór.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here