Diretór Jerál Klínika Bairru-Pite, Inácio dos Santos. Foto TATOLI: Nelia Fernandes

DILI, 21 janeiru 2020 (TATOLI)-Jestór klínika Bairru-Pité, Inacio do Santos hateten, bainhira klínika atu la’o ba oin klínika iha nia regra rasik hodi husu pasiente sira-nia konstribuisun bainhira pasiente ida atu konsulta kontribui netik $1.

Maske nune’e, nia hatutan, klínika iha fleksibilidade bainhira pasiente balun mai konsulta laiha osan atu kobtribui klínika nafatin atende sira hodi halo tratamentu saúde.

“La’os pasiente hotu-hotu mai ho $1, lae. Maibé balun mai mak osan laiha, laiha buat ida. Ita nafatin halo tratamentu. Maibé pasiente balun iha osan bele kontribui hodi bele halo tratametu no sira fó sentavus 25 mós, ami simu, la’os ami atu hili de’it $1, lae. Sira fó sentavu 10 de’it mós ami simu tanba ida ne’e mós kontribisaun,” dehan Jestór Klinika Bairo-Pité, Inacio dos Santos, ba jornalista sira iha nia kna’ar fatin, ohin.

Nia esplika, kada fulan sira hetan $3.000 ne’e husi kontribuisaun sira. Tanba ne’e mak ami suporta fali funsionáriu sira-nia transporte no balun ami rai ba funsionamentu klinika nian hodi sosa surat-tahan ba pasiente sira.

Entretantu, nia esplika, ba pasiente sira ne’ebé mak moras grave entaun sira transfere ba Hospital Nasional Guido Valadares no pasiente  balun ne’ebé seidauk di’ak, sira fó alta ona entaun pasiente sira husu atu baixa fali fali iha Klinika Bairru-Pité.

“Entaun ami ko’alia ho ami-nia team profisionál saúde sira katak ami halo atendimentu voluntáriu iha loron de’it. Se baixa (internamentu), ami atendimentu kalan ne’e la bele. Ami esplika di’ak ba pasiente sira no pasiente barak prontu atu fó kontribuisaun. Entaun, Diretór Klínika Bairru-Pite dezide atu fó baixa ba pasiente balun ne’ebé hakarak baixa,’’ nia informa.

Ba asuntu kontribuisaun ne’e, nia dehan, husi parte Klinika informa ona ba Vise Ministra Kuidadu Saúde Primária no mós Ditetór Polítika no Kooperasaun no Diretór Saúde Munisípiu Dili, tanba krize finanseiru ne’ebé mak iha, parte klinika husu kontribuisaun ba pasiente sira ne’ebé baixa tanba sira mak hakarak baixa hodi fó kotribuisaun no ajuda fali funsionamentu klinika nian.

“Ami la husu kontribuisaun boot hanesan klínika privadu sira to’o $100 ba leten no ami la hanesan ho VIP iha HNGV kada kalan ida selu $35. Maibé, ami fó kotribuisaun kada ema ida $5 ka $10 kada loron ida. Kontribuisaun ne’e mós tuir kapasidade pasiente nian. Se sira kontribui liután, ida ne’e ami agradese no balun la to’o maibé ami atende halo tratamentu nafatin,” nia esplika.

Aleinde ne’e, nia informa, sira hetan kontribuisaun husi dentaria nian tanba ai-moruk ne’e suporta husi  Governu mós laiha no médiku espesialista ba nehan mós laiha, entaun ami husu ba populasaun sira ne’e para fó kontribuisaun ba ai-moruk.

“Ai-moruk sira ne’e, ami hameno husi Indonézia no ai-moruk kaixa ida $95. Tanba ne’e mak ami husu ba pasiente sira-nia kontribuisaun no sira mai losu nehan no hamoos nehan kontribuisaun ne’e $5 ka $10 para suporta médiku sira nia serbisu no sosa fali ai-moruk sira ne’e,” nia hateten.

Notísia relevante:Klínika Bairru-Pité Menus Ai-moruk

Jornalista : Felicidade Ximenes

Editór        : Rafy Belo

HAKEREK NO HATÁN

Please enter your comment!
Please enter your name here