DILI,17 janeiru 2020 (TATOLI)-Klínika Bairru-Pité menus ai-moruk tanba ne’e pasiente sira ne’ebé mak presiza ai-moruk fó de’it mak sorin ka métade.

“Ami-nia ai-moruk mós menus liu, pasiente sira presiza ami fó sorin deit tanba ai-moruk la iha,” Diretór Klínika Bairru-Pité, Daniel Murphy Ba jornalista sira, iha nia kna’ar fatin, ohin.

Nune’e mós tuir Doutór Daniel Murphy katak pasiente sira ne’ebé mak halo internamentu iha klínika privada ne’e mós la iha enfermeira kalan, kombustivel ba ambulánsia mós la iha, maternidade mós la iha. “Ami triste liu ida ne’e, hanesan kastigu boot ba Timór”.

“Ami Klínika Bairru-Pité osan la iha. Problema mak hanesan ne’e, ami osan la iha, ami ajuda Timór barak ona hodi hetan saúde di’ak, fó milagre barak ona maibé to’o agora ema la hatan ba valór ida ne’e entaun ami susar tanba pesoál saúde ne’ebé servisu iha ne’e mesak voluntáriu deit.

Nune’e mós Doutór Daniel reforsa: “Governu fó ajuda mós balun de’it, la to’o nafatin. Ami klínika agora ne’e boot, pesoal saúde ne’ebé mak servisu iha ne’e ema hamutuk 100 maibé atu selu ema sira ne’e hotu tenke osan 50 mil fulan-fulan”.

Ezekutivu Klínika Bairru-Pité haklaken, maske sira la halo internamentu ona ema iha klínika maibé sira kontinua konsulta loroloron. “Ema hotu sente triste tanba ami esperiénsia dezde hahú tinan- 1998 to’o agora maibé ami iha fasilidade ne’ebé mak menus liu.

“Husu ba Governu liuliu Ministériu Saúde katak fulan fulan tenki fó 50 mil ba Klínika Bairru-Pité atu nune’e ami labele hanoin ba difikuldade ne’ebé ami hasoru kona-ba orsamentu maibé ami hanoin de’it ba ema nia moras halo tratamentu, ida ne’e de’it.

Entretantu, pesoál saúde ne’ebé mak sai voluntáriu iha Klínika Bairru-Pité hamutuk ema 92, inklui funsionáriu sira.

Notísia relevante:Apoiu Tratamentu Ba Kbiit Laek, Klínika Bairru-Pité Iha Programa Prioridade Lima

Jornalista    : Felicidade Ximenes

Editór          : Rafy Belo

HAKEREK NO HATÁN

Please enter your comment!
Please enter your name here