Simulasaun ba instalasaun module AGI iha Postu Administrativu Quelicai. Imajen/IPG.

DILI, 03 janeiru 2020 (TATOLI) – Institutu Petróleu no Jeolojia (IPG, sigla portugés) hahú koleta fali module Amplified Geochemical Imaging (AGI) ne’ebé instala iha bloku A.

Xefe Unidade Petróleu no Gás, Joanico Pires, informa instalasaun AGI iha bloku ne’e komesa rekolla iha 3 to’o 5 janeiru ne’e.

“Hahú ohin, dia 3 to’o 5 de janeiru 2020, ekipa téknika IPG sei koleta ou retrieval fali module AGI ne’ebé antes ne’e instala ona iha Postu Vemasse, Venilale Munisípiu Baucau, no Postu Administrativu Ossu, Munisípiu Viqueque”, Xefe Unidade Petróleu no Gás, Joanico Pires, ba TATOLI via telefone, ohin.

Joanico hatutan, ekipa rekolla hikas  module AGI iha postu tolu ne’e, sei lori tempu loron tolu no iha blok ne’e iha pontu hamutuk 36 mak atu rekolla module AGI refere.

Entretantu, ekipa sei rekolla ekipamentu AGI iha bloku B hahú iha 6 to’o 14 janeiru ho durasaun tempu loron sia iha Postu Administrativu Watulari, Quelicai no Baucau.

Retrieval ou koleta module AGI iha bloku C sei lori tempu loron lima hahú iha 15 to’o 20 Janeiru 2020.

IPG instala ekipamentu ou teknolojia modernu ho naran AGI ba bloku tolu iha Vemasse, Venilale no Ossu hahú iha 13/12/2019 ho nia objetivu atu hatene ezisténsia idrokarbonu iha rai-okos, atividade kalibrasaun ba posu abandona no sampling mina no gás.

IPG halo peskiza mina no gás utiliza ekipamentu ou teknolojia modernu ho naran AGI hodi identifika ezisténsia mina no gás iha munisípiu Baucau no Viqueque.

Peskiza ne’e halo durante fulan 6 hahú iha 10 dezembru 2019 no remata iha juñu 2020, maibé atividade kuda no mós hasai instrumentu AGI iha terrenu ne’e hala’o durante loron 42.

Ekipamentu AGI nu’udar teknolojia modernu ne’ebé utiliza ba esplorasaun jeokímika hodi identifika mina, gás liuhusi migrasaun microseepage, indika ho kímika analítika husi C2 to’o C20 iha fatuk jeradór ou fatuk rezervatóriu.

Estudu ne’e nu’udar kontinuasaun ba estudu sistema petróleu ne’ebé hala’o iha área refere iha 2016 to’o 2017 no hatudu rezultadu ne’ebé di’ak ba konsentrasaun petróleu no gás.

Notísia relevante : IPG Finaliza ona Instalasaun Ekipamentu AGI iha Bloku C

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here