Asosiasaun Defisiensia Timor-Leste (ADTL) hala'o konferensia imprensa iha otel Vila Verde, ohin. Foto Rafy Belo

DILI, 21 janeiru 2020 (TATOLI)-Ministériu Solidaridade Sosiál no Inkluzaun (MSSI) iha posibilidade sei la implementa planu estabelese konsellu nasionál ba ema ho defisiénsia, iha 2020 tanba Parlamentu Nasionál la aprova proposta orsamentu jerál estadu foinlalais.

“Planu atu estabelese Konsellu Nasionál ema ho defisiénsia labele realiza,”katak  Diretór Jerál Ministériu Solidaridade Sosiál no inkluzaun, Rui Exposto, ba TATOLI, iha Mascarenas Dili,ohin.

Notísia Relevante:MSSI Sei Estabelese Konsellu Nasionál Defisiénsia

Durante tinan 2019, ekipa téknika MSSI konsulta ona esbosu polítika nasionál ema ho defisiénsia ba periodu 2020-2024 ho liña ministeriál,  no dadaun ne’e tama ona iha prosesu finalizasaun.

Nia dehan, planu hodi implementa Konsellu Nasionál ne’e parte ida atu prepara kondisaun antes governu ho parlamentu ratifika konvensaun internasionál kona-ba direitu ema ho defisiénsia.

Notísia Relevante:PN ho Governu Sei Ratifika Konvensaun Direitu Ema ho Defisiénsia

“Buat hotu la’o di’ak iha tinan 2021 ou 2022 Timor-Leste bele realiza Ratifikasaun konvensaun internasionál ema ho defisiénsia,”tenik Diretór Jerál MSSI.

Governu konsidera polítika nasionál ne’e importante atu fó protesaun no asisténsia ba defisiénsia sira liliu asesu ba edukasaun, saúde, justisa no seluk tan.

Notísia Relevante:ADTL Ezije Governu Ratifika Konvensaun Direitu Ema Ho Defisiénsia

“Esforsu lubuk ita halo ona wainhira planu hirak hetan aprovasaun ho nia orsamentu governu liuhosi ministériu ida-idak bele implementa,”tenik tan.

Jornlista : Nelson de Sousa

Editór : Francisco Simões

HAKEREK NO HATÁN

Please enter your comment!
Please enter your name here