Ema ho defisiénsia sira, simu negosiadór prinsipál fronteira maritima Kay Rala Xanana Gusmão. Imajen/ António Goncalves

DILI, 14 janeiru 2020 (TATOLI)-Ministériu Solidaridade Sosiál no Inkluzaun (MSSI)iha tinan 2020, sei hahú estabelese Konsellu Nasionál Defisiénsia ho ninia funsaun maka atu monitoriza no fó advokasia ba governu liliu ba polítika ho ninia implementasaun sira.

Diretór Nasionál ba Ema ho Defisiénsia, Mateus da Silva, informa planu estabelese konsellu nasionál defisiénsia ne’e,  hahú kedas iha governu konstitusionál da-neen, ne’ebé lidera hosi eis Primeiru-Ministru, Rui Maria de Araújo, maibé la konsege tanba ne’e  sei realiza iha mandatu governu da-ualu.

Notísia Relevante:MSSI Hahú Analiza Planu Asaun Ema ho Defisiénsia

“Iha tinan ne’e ita tau fila-fali planu sei estabelese konsellu nasionál ba ema ho defisiénsia,” reforsa,  Mateus da Silva, ba Agência TATOLI, iha ninia servisu fatin, Caicoli,ohin.

Molok aprezenta fila-fali esbosu ne’e ba governu hodi deskute  no aprova iha reuniaun konsellu ministru, iha tempu besik, MSSI liuhosi ninia ekipa tékniku sei halo revizaun ba  esbosu governu ne’ebé kria ona iha mandatu governu da-neen ne’e.

Notísia Relevante:PN ho Governu Sei Ratifika Konvensaun Direitu Ema ho Defisiénsia

“Hafoin finaliza prosesu sira ne’e iha tinan ne’e nia laran MSSI sei aprezenta ba konsellu- ministru hodi fó apresiasaun,”tenik tan.

Diretór ne’e garante bainhira implementa ona polítika governu ne’e sei fortifika kna’ar no funsaun organizasaun sosiedade sivíl no asosiasaun defisiénte sira atu fó advokasia di’ak liután ba defisiénsia sira.

Entretantu, tuir relatóriu sensu uma-kain  2015  rejista sidadaun Timoroan ho kondisaun defisiénsia fíziku, mentál, monok no seluk tan hamutuk 38.118.

Jornalista:Nelson de Sousa

Editór : Francisco Simões

HAKEREK NO HATÁN

Please enter your comment!
Please enter your name here