DILI, 20 janeiru 2020 (TATOLI)–Primeiru-Ministru (PM),Taur Matan Ruak deklara katak Aliansa Mudansa ba Progresu (AMP) la eziste ona dezde Orsamentu Jerál Estadu (OJE) tinan 2020 sumba iha Parlamentu Nasionál (PN), sesta (18/01).
Tanba ne’e, ohin PM Taur husu rasik ba Prezidente Repúblika atu hasoru malu hodi hala’o enkontru espesiál, atu informa kona-ba asuntu ne’e.
“Enkontru ne’e ha’u mak husu atu informa sekuénsia debate orsamentál ba Xefe Estadu. Públiku hatene, iha sesta liubá OJE sumba ka la liu. Ne’e situasaun ida-ne’ebé hatudu en-primeiru lugár katak AMP laiha ona. Segundu, hatudu katak ita iha nesesidade atu ultrapasa situasaun ida-ne’e”, PM dehan iha Palásiu Prezidente Nicolau Lobato, Bairru Pité, Dili, segunda ne’e.
Lee mós: Proposta OJE 2020 La Pasa
Tanba ne’e, nia haktuir, nia mai atu hateten ba PR katak ninia fatin nu’udár PM, ne’e depende ba dispozisaun PR nian.
“Desizaun saida de’it ha’u prontu atu kontinua fó apoiu tomak”, PM Taur deklara.
Nia hatutan, AMP iha kompromisu tolu importante, katak programa tenke pasa, no partidu tolu ne’e tenke vota, segundu osamentu tenke pasa, terseiru lei sira estruturante ne’e tenke liu maibé kontráriu fali.
“Orsamentu la liu. CNRT mak vota kontra. Sinál katak AMP laiha ona. Deputadu CNRT sira mak baku mate tiha AMP. Ha’u husu diskulpa ba lideransa CNRT, PLP no KHUNTO, ba militante no simpatizante sira ne’ebé serbisu mate an ba AMP nia susesu. Maibé, infelizmente, deputadu CNRT sira baku mate tiha AMP”, nia dehan tan.
Kona-ba ida-ne’e, Taur dehan, ne’e la’ós traisaun, maibé iha deklarasaun polítika CNRT hateten katak PR la fó pose ba membru Governu na’in sia, no segundu tanba sira dehan katak Primeiru-Ministru sobu sistema.
Tanba ne’e, Taur fó analojia ida katak iha kareta ida PR sobu tiha roda ida, PM sobu kadeira no deputadu CNRT sira mak sunu tiha kareta nee.
Nune’e, nia husu katak ida sobu roda ne’e mak sala ka ida sunu kareta ne’e mak sala.
Nia deklara katak desizaun hotu iha Prezidente Repúblika no PM sei haruka karta iha tempu badak.
“PR sei ko’alia ho partidu polítiku sira no ohin la fó resposta ruma ba ha’u”, Taur informa.
Nune’e, Taur husu ba povu iha Timor laran tomak atu kontinua hakmatek hodi akompaña situasaun.
Jornalista: Cipriano Colo
Editór: Xisto Freitas
