Jurista Timoroan, Manuel Tilman. Imajen Tatoli/Evaristo Soares Martins

DILI, 18 janeiru 2020 (TATOLI)—Jurista Timoroan, Manuel Tilman hateten Governu labele aprezenta proposta lei orsamentu foun iha tinan ida-ne’e tanba lei la fó dalan.

“Primeiru-Ministru sei la aprezenta tan proposta orsamentu foun, tanba Konstituisaun RDTL artigu 97 hateten proposta lei ne’ebé rejeitadu iha sesaun Parlamentár ida-ne’e (tinan ekonómiku 2020 ne’e) labele hatama tan orsamentu foun ida iha 2020. Nia só bele tama iha 2021”,  nia dehan ba Agência Tatoli iha Praia dos Coqueiros, Dili, sábadu ne’e.

Jurista ne’e esplika, hafoin proposta lei orsamentu rejeitadu ona hosi Parlamentu Nasionál, entaun lori loron neen-nulu (60) Prezidente Repúblika disolve Parlamentu Nasionál.

Lee mós: Proposta OJE 2020 La Pasa

Nia dehan, molok disolve Parlamentu Nasionál, Prezidente Repúblika sei rona bankada Parlamentár sira ne’ebé iha Parlamentu no rona Konsellu Estadu. Kuandu disolve Parlamentu Nasionál, automatikamente Governu monu no Governu mantein en-funsaun to’o eleisaun foun.

Tuir Konstituisaun artigu 96 (autorizasaun lejizlativu), alínea 3 subliña, lei autorizasaun lejizlasaun nian labele uza liu dala-ida, no ramata ho demisaun Governu nian, ho termu lejizlatura nian ka ho disolusaun Parlamentu Nasionál.

Nune’e mós, artigu 97 (inisiativa lei nian) alínea 2, hateten labele aprezenta projetu foun no proposta lei nian ka alterasaun iha tinan ekonómiku ne’ebé la’o daudaun, foti sa’e despeza no hatún reseita Estadu nian ne’ebé mai iha orsamentu ka Orsamentu Retifikativu sira.

Alíneia 4 hosi artigu 97 ne’e mós dehan, projetu no proposta lei sira ne’ebé la vota ba, bele halo fali sesaun lejizlativu ida la simu tuirmai, lae de’it bainhira termu lejizlatura mak la hatán, no alínea 5 hosi artigu ne’e esplika, proposta lei nian ramata ho Governu nia demisaun.

Jurista Manuel Tilman esklarese, Primeiru-Ministru mak demitidu sei bele nomea fali partidu segundo mais votado atu propoin Primeiru-Ministru no Primeiru-Ministru propoin ministru sira toma pose.

“Maibé agora ne’e Parlamentu maka está em questão. La aprova Orsamentu Jerál Estadu durante loron neen-nulu (60). Konstituisaun artigu 86 alínea f fó kompeténsia ba Prezidente Repúblika disolve Parlamentu Nasionál hafoin rona bankada Parlamentár sira iha Parlamentu no rona Konsellu Estadu tanba tenke garante pás no estabilidade no depois iha loron 30 nia laran marka fali eleisaun foun”, Tilman subliña.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here