Diretór Jerál Klínika Bairru-Pite, Inácio dos Santos. Foto TATOLI: Nelia Fernandes

DILI, 30 setembru 2019 (TATOLI)-Prioridade ba programa Klínika Bairru-Pité iha lima hanesan Tuberkulozu VIH/SIDA (Virus Inmunodeficiencia Humana/ Síndrome de Inmunodeficiencia Adquirida), Kankru Leokimia, má Nutrisaun no Saúde Feto nian.

Diretór Jerál Klínika Bairru-Pite, Inácio dos Santos konsidera katak Klínika Bairru-Pité sai nu’udar sentru tratamentu ba TBC bo’ot liu iha Timór laran tomak, em termos detesaun kazu, halo tratamentu no apoiu tratamentu ba pasiente sira ne’ebé kbiit laek.

“Se programa ne’e mak taka kusta oituan, bele fó impaktu ba komunidade tomak. Tanba nia da´et ne’e lais los. Ema ida bele da´et ba ema 20 durante iha nia moras tanba fó impaktu ne’ebé boot,” konsidera Diretór, Inacio dos Santos iha entrevista ho jornalistaAjénsia TATOLI iha Klínika Bairru-Pite, ohin.

Nia esplika, impaktu ida mak konsulta internamentu para, signifika TBC baixa la iha ona.  “Agora problema ba ami mak se pasiente sira mai pozitivu, ami labele haruka sira ba uma tanba kuandu bakteria tahan asam (BTA) pozitivu ona, ne’e sira risku atu hada’et ba komunidade, atu hada’et ba nia família tomak no ida ne’e ami tenke halo izolamentu ba sira; hela iha fatin izola sira para labele asesu ba komunidade ou labele hada’et ba ema seluk”.

Diretór Inácio dos Santos akresenta, agora krize finanseira ne’ebé iha, entaun ida ne’e la akontese maibé sira buka solusaun hanusá para la’o di’ak. Sira mós kontaktu ona ho Klibur Domin para oinsá bele halo kolaborasaun.

“Pasiente sira ne’ebé pozitivu ba TBC ne’e, ami la halo tratamentu internamentu ou izolamentu iha ne’e maibé ami sei haruka ba sira atu halo izolamentu iha sira-nia fatin halo tratamentu para labele hada´et ba ema seluk”.

Nia informa, maismenus pasiente VIH/SIDA 30% mós halo tratamentu no akonsellamentu iha Klínika Bairru-Pité.“Entaun, ida ne’e ami sei la’o nafatin, ami lakohi ida ne’e atu taka tanba programa TBC ho HIV/Sida ne’e hanesan maun-alin, sira rua hanesan ema ne’ebé re-ativu no positivu ona afetadu husi virus ida ne’e. Entaun, nia mós risku aas atu hetan TBC ona, “dehan Diretór Inacio dos Santos.

“Terseiru ami iha programa ida naran Kankru Leokimia tanba sentru tratamentu iha Timór laran tomak Klínika Bairru Pite de’it tanba ami hetan ai-moruk mai husi kompania Nova Artes iha swiszelandia, sira mak fó tratamentu ai-moruk sira mai ami,” nia hatutan.

Diretór Inácio dos Santos haktuir katak HNGV (Ospitál Nasionál Guido Valadares) mós haruka sira-nia pasiente, agora na´in s hodi halo tratamentu iha Klínika Bairru-Pité tanva ne´e sira labele atu hapara maibé sei kontinua nafatin programa. “Ita agora daudauk iha pasiente na’in 16 mak halo tratamentu hela, kuandu programa ne’e taka, kustu ne’e karun tebes ba ita-nia populasaun sira atu halo tratamentu privada,” nia konsidera.

“Agora kuatru ne’e mak má nutrisaun, ami foka liu ba  má nutrisaun tanba iha dadus ne’ebé hatudu katak ita iha populasaun kuaze 25.000 moris ho má nutrisaun, ho ida ne’e liuliu ita-nia labarik sira agora, iha ne’e idade tinan lima mai kraik ne’e sira iha risku maka´as atu hetan malnutrisaun,” katak Inácio dos Santos.

Nia esplika, problema má nutrisaun ba ita Timór ne’e la’ós problema ita la iha hahán maibé problema mak ita-nia konesimentu inan-aman nian kona-ba nutrisaun ne’ebé iha nia hahán lokál nian rasik.

“Ezemplu, ha’u bele dehan katak iha hahán lokál ne’ebé nutriente ne’e maka´as liu duke hahán ne’ebé ita importa husi li´ur. Entaun, ita-nia populasaun sira ladún koñese ida ne’e.Sira konsume hahán ne’ebé hanesan de’it, dala ruma konsume hahán ne’ebé mai husi li´ur ho kustu ne’ebé boot mas sira la preokupa ho hahán lokál ne’ebé iha,” nia konsidera.

Kona-ba programa serbisu sosiál saúde feto, nia esplika katak Klínika Bairru-Pité foka liu ba hakbiit feto. “Programa ne’e ami la hapara, ami prioridade”. Basá, tuir Diretór Inácio dos Santos inan sira iha edukasaun ne’ebé naton, entaun sira iha posibilidade ne’ebé aas atu hodi oan sira ho família sira ba hakbesik aan ba iha serbisu saúde sira no inan sira iha koñesimentu oinsá para eduka oan sira iha moris saudavel, duke aman sira.

“Segundu ita Timór risku violénsia doméstika ne’e barak los, ami ko’alia kona-ba igualidade inan sira halo nusa mak tenke hanesan ho mane em termos saúde, inan sira tenke iha kapasidade tomak para lidera família uma laran rasik,” nia konklui.

 Jornalista : Nelia Fernandes

Editór       : Rafy Belo

HAKEREK NO HATÁN

Please enter your comment!
Please enter your name here