Vise-Ministru Negósiu Estranjeiru no Asuntu Parlamentár Japaun, Norihiro Nakayama. Imajen/Antonio Goncalves.

DILI, 15 janeiru 2020 (TATOLI) – Vise-Ministru Negósiu Estranjeiru no Asuntu Parlamentár Japaun, Norihiro Nakayama, hateten Governu Japaun prontu apoia nafatin dezenvolvimentu transporte marítima iha Timor-Leste (TL).

“Ha’u impresionadu tebes ho beleza tasi Timor-Leste nian. Ne’ebé Governu Japaun sei kontinua apoia iha dezenvolvimentu transporte Marítima”, Vise-Ministru Japaun afirma liuhusi diskursu iha serimónia inaugurasaun projetu realokasaun urjente terminál ró iha Portu Dili, ohin.

Norihiro Nakayama adianta ho apoia Estadu no Povu Japaun nia osan ba konstrusaun terminál ferry ne’e, bele hametin relasaun bilaterál iha futuru. “Ha’u hakarak espresa ha’u-nia mellór votu ba dezenvolvimentu liután relasaun bilaterál no imi-nia susesu ba iha tinan barak oin mai”, espera.

Governante japonés ne’e dehan: “Ha’u hakarak extende ha’u-nia parabéns ba inaugurasaun terminál ferry iha Portu Dili nian finansiadu husi Governu Japaun. Ha’u hakarak mós espresa ha’u-nia respeitu boot no gratidaun ba grande esforsu halo husi ema sira-ne’ebé envolvidu husi país rua ne’e to’o ohin”, nia agradese.

Nia salienta Timor- Leste hanesan ho Japaun, Estadu marítimu ida ne’ebé hale’u husi oseanu ne’ebé luan, transporte marítimu mak xave ba dezenvolvimentu ekonómiku no liña moris nian.

Hodi dehan, Governu Japaun realoka no expande ona terminál ba ferry, hodi bele hala’o operasaun ne’ebé seguru no efisiente ba naviu pasajeiru no karga nian.

Nune’e, nia garante instalasaun ne’e mós sei kontribui ba melloramentu atividade ekonómika liuhusi asesu melloradu ba enklave no illa remota, no expansaun transporte marítimu.

“Hahú husi agora, ha’u espera katak Portu Dili, infraestrutura transporte ne’ebé importante liu iha país ne’e, sei utiliza ho maxima atu hariku vida povu Timor-Leste nian no promove dezenvolvimentu nasionál”, katak.

Hodi hatutan projetu ne’e sei ajuda Governu rai rua atu realiza Indo-Pasífiku ne’ebé livre no abertu, espesialmente husi pontu de vista fortalese konetividade.

Ministru Transporte no Komunikasaun,
José Agostinho da Silva. Imajen/Antonio Goncalves.

Ministru Transporte no Komunikasaun, José Agostinho da Silva, ne’ebé reprezenta Primeiru-Ministru, Taur Matan Ruak, hateten lori Estadu no povu nia naran agradese no orgullu ba apoia husi Estadu no Povu Japaun ba konstrusaun realokasaun terminál ró ne’e.

“Ha’u lori Governu no povu nia naran agradese no orgullu ba Japaun no Povu Japaun ne’ebé apoia konstrui terminál ferry ho kualidade enjeñaria ne’e”, nia hato’o.

Ministru José Agostinho da Silva dehan Timor-Leste mós kontinua husu ba Japaun liuhusi Japan International Cooperation Agency (JICA) atu kontinua tulun dezenvolvimentu transporte marítima iha país ne’e.

“Timor-Leste nia kooperasaun ho Japaun sai ezemplu furak tanba terminál ferry ne’e ho kualidade enjeñaria atu fasilita pasajeiru lokál no internasionál ne’ebé hakarak vizita Oe-Cusse no Atauro”, katak.

Polítika Oitavu Governu Konstitusionál sei kontinua prioritiza transporte marítima hodi mellora konetividade hodi hasa’e rendimentu ekonomia.

“Povu Timor-Leste sente kontente ho imi-nia apoia no kontinua applause apoia ne’ebé Estadu Japaun no Povu Japaun nian hodi hametin amizade no bilaterál”, afirma.

Prezidente APORTIL, Flávio Cardoso Neves. Imajen/Antonio Goncalves.

Entretantu, Prezidente Konsellu Administrasaun Autoridade Portuária (APORTIL), Flávio Cardoso Neves, mós agradese ba apoia husi Governu no Povu Japaun ba konstrusaun terminál ne’e to’o inaugurasaun.

“Tanba terminál fasilita tebes ami, liuliu ami-nia ró Nakroma no ró sira seluk atu mellora transportasaun marítima iha Timor-Leste liuliu fasilita viajen abitante Oe-Cusse no Atauro”, nia dehan.

Konstrusaun projetu ne’e hanesan, ponte kais ida ho naruk metru 100 no luan metru 20 ne’ebé bele akomoda ró pasajeiru rua durante oras 24 nia laran, asesu dalan (moveable land platform) ho medida metru 55×52 ne’ebé kompleta ho ekipamentu nesesáriu seluk hanesan iluminasaun, fornesimentu bee, fornesimentu enerjia, torneira hamate-ahi no ekipamentu ba seguransa.

Konstrusaun projetu refere hala’o hosi kontraktor Japonés Tobishima Corporation no supervizionadu hosi Japan Port Consultants, Ltd & Ides Inc. ho valór orsamentu kuaze Yen 2.197 (maizumenus millaun $21) no Governu Timor-Leste mós aloka osan millaun $1.147.700. Durasaun konstrusaun hahú iha 6 jullu 2017 to’o 31 marsu 2019.

Durante konstrui terminál ne’e, fó serbisu ba ema lokál hamutuk 90. Konstrusaun projetu ne’e ho objetivu atu realiza operasaun ba transportasaun pasajeiru ne’ebé seguru no efikás liuhosi realokasaun terminál eziste ne’ebé kria konfuzaun ba movimentu entre pasajeiru ró ho kontentór sira ne’ebé operasionadu hosi ekipamentu.

Ho konstrusaun terminál ne’e, sei hasa’e númeru transporte marítima no movimentu ema, nune’e mós transportasaun sasán entre área remota atu kria koneksaun foun aléinde Oe-cusse no Atauro.

Partisipa iha serimónia inaugurasaun ne’e, eis Prezidente Repúblika Timor-Leste, José Ramos Horta, embaixadór akreditadu sira iha Timor-Leste, eis Vise-Ministru Obra Públiku, Transporte no Komunikasaun, Inácio Moreira, reprezentante deputadu sira iha Parlamentu Nasionál no diretór no kargu xefia husi liña ministeriál sira.

Notísia relevante : Hahú ho Rituál, Hafoin Governu TL no Japaun Inaugura Realokasaun Terminál Ró

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here