Viveiru ai-oan iha Maubara. Imajen/Egas Cristovão.

DILI, 16 janeiru 2020 (TATOLI) – Ministériu Agrikultura no Peska (MAP) apela ba komunidade atu hakbesik ba sentru viveiru sira iha territóriu hodi foti ai-oan atu kuda iha ida-idak nia horik fatin, kintál no fatin sira ne’ebé merese ba.

Apelu ne’e hato’o hosi Ministru Agrikultura no Peska, Joaquim José Gusmão dos Reis Martins, iha Parlamentu Nasionál (PN), kuarta ne’e, bainhira partisipa iha debate loron dahuluk jeneralidade proposta Orsamentu Jerál Estadu (OJE) 2020.

“Iha loron hirak liubá ita halo lansamentu hodi komemora loron Ai-kameli no mós Floresta nian ne’ebé konsentra iha Manduki. Iha ne’ebá mós lansa loron kuda ai-horis nian ba tinan 2020. Ita husu partisipasaun komunidade, grupu, ONG sira atubele hakbesik ba sentru viveiru 37 iha territóriu no mós sentru viveiru iha Maubara, Viqueque, Lautem, no Manufahi, komunidade sira bele asesu ba ai-oan ne’ebé ministériu prepara hela”, ministru dehan..

Inisiativa kuda ai-oan ne’e hola parte mós iha programa Governu nian atu kuda ai-oan hamutuk tokon ida iha territóriu tomak iha kada tinan.

Fini ai ne’ebé prepara iha sentru viveiru sira mak hanesan, ai saria, ai-teka, ai-ná, ai-kakeu, no bamboo, prepara mós ai-fuan mak has, saburaka, kulu.

“Espera katak ita hothotu bele partisipa, ita hatene katak agora daudaun ne’e sai hanesan isu globál ida kona-ba mudansa klimátika, ita hotu iha responsabilidade para bele haburas fali ita-ninia nasaun. Tan ne’e, ita ida-idak kuda ai-oan komesa hosi ita-nia uma oin to’o ita serbisu fatin, no to’o fatin sira ne’ebé ita sente katak bele kuda ai-oan”, sujere.

Nune’e, Ministériu Agrikultura no Peska liuhosi Diresaun Jerál Floresta apoia viveiru sira ne’ebé maka iha tiha ona.

Governante ne’e dehan, laiha limitasaun ba asesu ai-oan, no halo de’it pedidu simples ba sentru viveiru sira no tau klaru kedas presiza ai-oan hira no tipu saida.

“Ita-nia guarda floresta sira halo monitorizasaun, liuliu ba ai-kameli ne’ebé maka sei hetan atensaun másima, nune’e balu mate karik kuda filafali no halo expansaun tan”, katak.

Governu liuhusi Ministériu Agrikultura no Peska (MAP) lansa ofisialmente kuda ai-oan millaun ida iha territóriu Timor-Leste iha 2020 iha Loron Nasionál Ai-kameli no Floresta, ne’ebé realiza iha iha plantasaun Aí-kameli Manduki, suku Aidaba-Leten, Postu Administrativu Atabae, Munisípiu Bobonaro.

Iha Sestu Governu Konstitusionál liuhusi reuniaun Konsellu Ministrus hili ona 13 janeiru nu’udar Loron Nasionál Ai-kameli no Floresta nian, ho objetivu atu fó atensaun liu ba knaar sentrál floresta nian iha manutensaun ba ambiente ida ne’ebé saudavel, iha konservasaun diversidade balada no ai-horis sira-nian, no iha dezenvolvimentu ekonómiku. Liuliu ba ai-kameli, rekoñese ona hanesan ai-horis emblemátika ne’ebé ho valór nasionál nian.

Notísia relevante : Loron Nasionál Ai-kameli no Floresta, MAP Lansa Kuda Ai-oan iha Territóriu

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here