Ministru Agrikultura no Peska, Joaquim José Gusmão dos Reis Martins, kuda ai-oan. Imajen/Mídia MAP.

ATABAE, 13 janeiru 2020 (TATOLI) – Governu liuhusi Ministériu Agrikultura no Peska (MAP) lansa ofisiálmente kuda ai-oan millaun ida iha territóriu Timor-Leste iha 2020.

“Ita mai komemora loron Nasionál Ai-kameli no Floresta nian, 13 janeiru, hodi bele realiza planu Oitavu Governu nia hodi bele lansa ofisiál no prepara ai-oan millaun ida atu kuda iha territóriu Timor-Leste kada tinan”, Ministru Agrikultura no Peska, Joaquim José Gusmão dos Reis Martins, afirma bainhira selebra loron nasionál Sándalu no Floresta ne’ebé realiza iha plantasaun Ai-kameli Manduki, Suku Aidaba-Leten, Postu Administrativu Atabae, Munisípiu Bobonaro, ohin.

Nune’e, Ministru Joaquim Gusmão dehan komesa husi komemorasaun loron nasionál nian bá oin maka abitante ne’ebé hakarak kuda ai-oan bele hakat bá sentru viveiru sira hanesan iha Mubara-Liquiçá, sentru viveiru iha Manufahi, Viqueque  no Lautem  no iha sentru viveiru komunitáriu hamutuk 37 iha territóriu  hodi foti ai-oan atu kuda.

“Ha’u husu ba abitante sira atu hadomi natureza no ambiente hodi hahú kuda ai-oan ne’ebé prepara ona iha sentru viveiru sira ne’e”, sujere.

Iha 2019, nia dehan seidauk kuda ai oan tanba sei halo produsaun ba ai-oan liu millaun ida ona. Enkuantu, ai-oan sira ne’e mak hanesan ai-kameli, ai-teka, mahoni, samatuku, bamboo no ai-oan fruta sira hanesan kulu, saburaka, haas no seluk ne’ebé preparadu ona ba komunidade ne’ebé iha interese bele kuda.

“Atu fanu nafatin ba sidadaun hotu katak floresta importante nafatin ba ita-nia moris loroloron no balada sira”, katak.

Nune’e, MAP kontinua motiva komunidade atu habarak ai-horis liuhusi asaun kuda ai-hun ida salva ema nia moris no balada sira.

Hafoin lansamentu ba kuda ai-oan iha territóriu tomak, MAP mós entrega ai-oan no sertifikadu apresiasaun ba abitante sira ne’ebé susesu ona kuda ai-oan iha sira-nia munisipiu.

Iha Sestu Governu Konstitusionál liuhusi reuniaun Konsellu Ministrus hili ona 13 janeiru nu’udar Loron Nasionál Ai-kameli no Floresta nian, ho objetivu atu fó atensaun liu ba knaar sentrál floresta nian iha manutensaun ba ambiente ida ne’ebé saudavel, iha konservasaun diversidade balada no ai-horis sira-nian, no iha dezenvolvimentu ekonómiku. Liuliu ba ai-kameli, rekoñese ona hanesan ai-horis emblemátika ne’ebé ho valór nasionál nian.

Notísia relevante : Viveiru Permanente Maubara Prepara Ai-oan Rihun 300 Distribui Iha 2020

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here