Diretór DNTT Natalino do Rosário. Imajen/Natalino da Costa

DILI, 16 janeiru 2020 (TATOLI) – Diretór Nasionál Transporte Terrestre (DNTT), Natalino do Rosário, informa DNTT ho Polísia Nasionál Timor-Leste (PNTL) deside ona atu halo operasaun rutina ba karreta no motorizada sira ne’ebé para la tuir fatin estasionamentu.

“Operasaun konjunta sei akontese iha fulan-fevreiru mai, tanba téknikamente presiza halo tan koordenasaun ho parte tránzitu hosi Komandu Jerál PNTL nian no Tránzitu PNTL Munisípiu Dili nian, tanba agora daudaun sei iha diskusaun orsamentu, nune’e tránzitu sira okupadu serbisu”, Natalino do Rosário ba Ajénsia TATOLI iha Balidi, ohin.

Tanba ne’e, operasaun ne’e sei hahú iha fulan oin nia-laran ho meiu patrulla no bainhira hetan karreta sira ne’ebé kondisaun la di’ak no dokumentu inspesaun karreta laiha, ekipa sei hapara sira nia movimentu.

“Ami ho PNTL konkorda ona atu halo operasaun ba transporte públiku sira liuliu ba ita-nian karreta taxi sira ne’ebé antigu ona sei la fó hodi halo operasaun, no sei haree veíkulu sira ne’ebé la para tuir sinál tránzitu, bainhira la kumpre maka sei multa dólar 9 to’o 24”, katak.

Enkuantu, transporte públiku liuliu taxi hirak ne’ebé rejistu iha DNTT, hahú iha 2002, besik 2000, maibé hirak ne’ebé mai renova rejistu no halo inspesaun besik 1000 de’it no hirak ne’ebé la mai mós kuaze 1000-resin.

Iha fatin hanesan, Komandante PNTL Munisípiu Dili, Superintendente Xefe Armando Monteiro, reforsa PNTL prontu kolabora ho DNTT atu halo kontrolu ba viatura sira ne’ebé para la tuir regra tránzitu.

Nia akresenta tanba ida ne’e mós planu prioridade VIII Governu nian ba seguransa rodoviária nian, tanba ne’e PNTL sei koopera hodi halo kontrolu.

“Ita haree agora daudaun, tempu ba tempu, transporte sira aumenta ba beibeik tanba ita mós eduka ita-nia sosiedade liuliu motorista sira tenke tuir, obriga sidadaun bele respeitu, halo tuir ita-nian lei ne’ebé iha”, dehan.

Notísia relevante : DNTT-PNTL sei Kontrola Viatura Para La Tuir Fatin

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here