Relatóriu ho títulu The Unseen, Unsafe : Underivestment in Ending Violence Against Children in the Pacific and Timor-Leste, ne’ebé lansa ohin.

DILI, 14 agostu 2019 (TATOLI)—Organizasaun internasionál hanesan Save the Children,  ChildFund, Plan International no World Vision, lansa relatóriu foun kompriensivu detalla hanesan nível xokante ba violénsia fízika,  emosionál no seksuál,  inklui infrenta neglijénsia hosi Labarik ne’ebé moris iha pasífiku no Timor-Leste (TL).

Relatóriu ne’e ho títulu The Unseen,  Unsafe : Underivestment in Ending Violence Against Children in the Pacific and Timor-Leste, ofisiálmente lansa iha eventu eskluzivu iha 14 agostu 2019, iha Hotel Timor, Dili.

Relatóriu ne’e publika iha jullu 2019 hatudu katak labarik liu pursentu 70 (millaun haat) iha nasaun ualu esperiénsia disiplina violentu iha uma.

Iha Timor-Leste, haktuir hosi relatóriu ne’e katak deskonsertante labarik pursentu 87 ka labarik liu 612,000 sofre violénsia fíziku ka emosionál iha uma.

Taxa mak “exesionálmente aas”no boot liu kompara ho nasaun viziñu sira hanesan Papua Nova Guinea, no nasaun pasífiku sira seluk.

Relatóriu ne’e mós hateten katak labarik sira ne’ebé infrenta violénsia no abuzu jerálmente sofre hosi hakanek fíziku sériu, lakohi isin rua, tranzmiti infesaun seksuál, trauma mentál to’o mate.

Hosi violénsia bele haki’ik dezenvolvimentu kakutak, ne’ebé afeta ba labarik ninia konsentrasaun, dezenvolvimentu linguajen no kapasidade atu lee no hakerek.

Peskiza kompila ona hosi Save the Children, ChildFind, World Vision no Plan International, hatudu mós katak % 30 feto foinsa’e sira (idade 15-19)  iha Timor-Leste sofre ona violénsia fízika.

Iha mós estudu ida ne’ebé hala’o Iha tinan 2016, estimasaun labarik mane %75 no labarik feto %67 iha Timor-Leste sofre ona kastigu fíziku,  hanesan tebe, basa no dada hosi mestre ka mestra ida.

Aleinde ne’e, neglijénsia nu’udar problema ida iha Timor-Leste, liliu grupu vulnerável sira hanesan labarik ho defisiénsia, ho estudu ida hatudu katak %72 ema ho defisiénsia nunka tuir eskola.

Organizasaun haat husu hodi apoiu liu-tan atu hakotu violénsia hasoru labarik tuir meta 16.2 ba Objetivu  Dezenvolvimentu Sustentável (ODS), ne’ebé revee ona iha  Fórum Polítika Altu Nível Nasaun Unida, Nova Iorke, iha jullu 2019.

Diretora ChildFund Timor-Leste, Erine Dijkstra hateten violénsia Iha ona impaktu profundu ba labarik no labarik hotu tenke sente seguru no protejidu iha sira-nia uma no eskola.

“Alvu intervensaun atu aumenta labarik nia kapasidade hodi buka apoiu bainhira sira inseguru, no treinu pozitivu inan-aman mak redúz violénsia, inklui abuzu hasoru labarik”, hateten nia.

Diretora ne’e hatutan relatoriu revela nível inadekuadu finansiamentu no medida polítika atu rezolve krize protesaun labarik.

Tamba ne’e, nia apela ba governu no parseiru dezenvolvimentu sira atu aloka fundu barak liu-tan,  espesífikamente ba rezolve violénsia hasoru labarik.

Nune’e mós, diretór World Vision, Fabiano Valente Franz apela ba abordajen unidu ida hodi hakotu violénsia hasoru labarik iha Timor-Leste.

“Tempu ona atu fó protesaun ba labarik Iha fuan no buat hotu ne’ebé ita hala’o. Ita hatene kna’ar saida mak ita redúz violénsia, nu’udar ezemplu,  programa atu muda nórma prejudika sira iha komunidade, edukasaun eskolár foku iha relasaun respeitozu, harii uma seguru no kriasaun forsa traballu forte ida ba protesaun labarik”, hateten nia.

Entretantu, Diretora PLAN International Timor-Leste, Dillyana Ximenes haklaken labarik liliu labarik feto,  sei apriende lidera, desidi no dezenvolve liu-tan iha realizasaun ba sira-nia direitu bainhira sira livre hosi violénsia.

PLAN International sei kontinua serbisu hamutuk ho komunidade, inan-aman no governu lokál, ho foku espesiál iha envolvimentu mane no labarik mane, atu garante katak, labarik liliu labarik feto sira seguru no livre hosi kualkér forma ba violénsia.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here