Ministru Ensinu Superiór, Siénsia no Kultura, Longuinhos dos Santos. Imajen/TATOLI

DILI, 14 janeiru 2020 (TATOLI)-Ministru Ensinu Superiór Siénsia no Kultura (MESSK), Longuinhos dos Santos, hateten área enjiñaria no saúde presiza kondisaun espesífika no diferente tebes ho kursu sira seluk.

“Ita hotu hatene katak área enjeñaria no saúde presiza kondisaun espesífika no diferente tebes ho kursu sira seluk. Ezemplu, laboratóriu, sala-de-aula ho ekipamentu sira espesífiku no presiza iha ligasaun ho internete ne’ebé ohin loron sai sasukat ida importante tebes iha área ensinu superiór ni’an,” Longuinhos dos Santos dehan, iha ninia diskursu iha ámbitu Inagurasaun ba edifísiu foun Fakuldade Enjeñaria, Siénsia no Teknolojia, UNTL iha Hera, Dili, ohin.

Governante ne’e reforsa,  área enjeñaria no saúde mak nesesita kondisaun ne’ebé di’ak, ba infraestrutura no ekipamentu tanba área rua ne’e mak iha taxa atu hetan serbisu ka empregabilidade aas liu no iha oportunidade boot liu atu dezenvolve projetu emprezariál.

Ho liafuan seluk, nia dehan, hetan serbisu no kria serbisu rasik sai hanesan preokupasaun rua ne’ebé prevista ona iha proposta polítika nasionál Ensinu Superiór nian ne’ebé Ministériu Ensinu Superiór, Siénsia no Kultura prepara ona no aprezenta ona nia liña jerál iha sorumotu konsellu reitór sira nian.

Nia hatutan, kualidade no exelénsia husi instalasaun foun ba Fakuldade Enjeñeria UNTL nian, sai hanesan investimentu ida ne’ebé aliñadu ho nesesidade merkadu traballu Timor-Leste ni’an.

“Ita-nia rain sei iha dezafiu barak iha nivel infraestrutura no implementa hela projetu konstrusaun oioin. Timor-Leste presiza atu reforsa kompeténsia nia infraestrutura saneamentu, dezenvolve irigasaun, instala no halo espansaun ba rede eletrisidade, telekomunikasaun no internet,” nia dehan.

Tanba ne’e, tuir governante ne’e presiza kontinua fó formasaun ba enjeñeiru sívil sira, espesialista eletróniku, espesialista ba informátika, espesialista ba kímika no biolojia sira.

“Presiza atu asegura formasaun ba tékniku sira ne’e, espesializadu hodi garante futuru ita-nia nasaun, hanesan afirma husi matenek na’in Amerikanu ni’an hanaran MALCOLM X: “Education is our passport to the future, because tomorrow belongs to the people preparing today”,” nia esplika.

Signifika, nia esplika, edukasaun sai hanesan pasaporte hodi garante futuru ba ita-nia Nasaun. Tanba ne’e, nia dehan, presiza asegura formasaun rekursu umanu ho kualidade atu garante futuru ne’ebé di’ak ba Timor-Leste ni’an.

Nia hatutan, profesór no estudante sira ne’ebé sai hanesan benefisiáriu prinsipál ba instalasaun foun hirak ne’e. Tanba, nia dehan, infraestrutura universidade nian halo parte prosesu pedagójiku no sei utiliza iha forma ne’ebé adekuadu no sei fó rezultadu ne’ebé di’ak em termos de didátiku no pedagójiku nian.

“Dosente no estudante sira, presiza kontinua hakaas aan hodi nune’e nia rezultadu sei sai exelente,” nia hateten.

Tanba ne’e,  nia husu ba dosente no estudante sira atu uza instalasaun foun ho kuidadu no uza ba objetivu prinsipál hodi hadi’a prosesu ensinu aprendizajen.

“Hein katak instalasaun bele dura, ho tempu naruk no tulun hodi fó formasaun ba estudante timoroan ho kualifikasaun di’ak,” nia dehan.

Maske nune’e, nia akresenta, dezafiu ida husi dezafiu sira seluk ne’e Timor-Leste hasoru mak oinsá atu hadi’a kualidade iha ensinu superiór ne’ebé relasiona ho oinsá atu hadi’a fasilidade sira.

“Signifika, presiza atu iha tan instalasaun ho kualidade ne’ebé di’ak hanesan,sala ba aula ni’an, biblioteka, kantina, gabinete ba profesór. Ida ne’e sai pasu fundamentál tebes ba hadi’a rezultadu aprendizajen husi ita-nia estudante sira,” nia hateten.

Notísia relevante:Japaun Kontinua Apoiu Dezenvolvimentu TL

Jornalista  : Nelia Fernandes

Editór         : Rafy Belo

HAKEREK NO HATÁN

Please enter your comment!
Please enter your name here