Diretór Jerál Planeamentu no Orsamentu Estadu MF, Januário da Gama. Imajen/Tatoli Egas Cristovão.

DILI, 13 janeiru 2020 (TATOLI) – Ministériu Finansa (MF) distribui ona Dotasaun Orsamentál Temporária (DOT) janeiru 2020 ho montante millaun $116,4 ba instituisaun Estadu sira.

Depois Konsellu Ministru aprova dekretu ezekusaun kona-ba rejime doudésimu, MF halo kedan lansamentu DOT ba fulan ida ne’e nian.

“DOT ne’e ho ninia baze kalkulasaun hosi OJE aprovadu 2019 nian, maibé halo mós identifikasaun no halo suspensaun despeza balu ne’ebé ita konsidera hanesan one off ka ramata iha 2019 nian, ne’ebé hosi tetu ida ne’e aprovadu 2019 ninian depois téknikamente Ministériu Finansa halo kalkulasaun hosi ida pur 12 hetan tetu finál agregadu DOT janeiru nian maka millaun $116,4″, Diretór Jerál Planeamentu no Orsamentu Estadu MF, Januário da Gama, informa iha salaun MF, Aitarak-laran, ohin.

Montante DOT ne’e, fahe ba kategoria saláriu no vensimentu hamutuk millaun $17,8, bens no servisu millaun $38,6, transferénsia públika millaun $26,6 no kapitál dezenvolvimentu millaun $33,4 no kapitál menór suspende tanba relativa ho prosesu aprovizionamentu.

“Hosi tetu millaun $116,4 ne’e inklui mós despeza ba empréstimu nian ne’ebé fulan-fulan halo kalkulasaun ho montante millaun $7,250. Ne’ebé ohin lansamentu ne’e, halo ho intensaun ida depois hosi parte Ministériu Finansa sei halo atualizasaun ba sistema GRP (Planu Rekursu Governu), finalmente, komesa aban ministériu no instituisaun sira bele hahú ezekuta ona rejime orsamentu temporária ida ne’e”, katak.

Nune’e, bele asegura katak mákina no funsionamentu administrasaun públika kontinua halo no liuliu programa no atividade sira ne’ebé konsidera hanesan on going ka kontinua hosi 2019 mai 2020 ne’e asegura nafatin iha rejime doudesimál.

Diretór Jerál Planeamentu no Orsamentu Estadu ne’e rekoñese katak ministériu no instituisaun sira sei hasoru difikuldade durante ezekusaun.

“Tanba tuir prátika no prinsípiu ne’ebé mai hosi enkuadramentu legál kalkulasaun ne’e tenke hanesan ne’e duni, maibé ministériu no instituisaun ida-idak mak tenke haree atu sukat sira-nia nesesidade hosi tetu ne’ebé distribui, konserteza kuandu halo distribuisaun tetu DOT ne’e iha médiu fulan-janeiru, implikasaun ida maka sira sei la ezekuta hotu, maibé ne’e hanesan prosesu inísiu ida ne’ebé gia karik sei halo estensaun ba DOT iha fulan tuirmai”, Januário afirma.

Nia hatutan tanba prosesu ne’e inisia agora, ezemplu prepara planu ezekusaun, planu asaun no planu aprovizionamentu mezmu orsamentu ne’e kaduka iha fin janeiru, maibé ninia prosesu ida ne’e sei tranzita ba fulan sira tuirmai, entaun ho kabimentu orsamentu DOT foun ne’ebé sei aplika fulan tuirmai iha ona ninia baseline ida atu ezekuta tanba prosesu ne’e la’o ona.

Notísia relevante : KM Aprova DOT ba Janeiru Millaun $116,4

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here