Primeiru-Ministru, Taur Matan Ruak, prezide reuniaun Konsellu Ministru iha Ministériu Finansa Aitarak-Laran, Dili, Segunda (13/01/2019). Imajen/TATOLI Egas Cristovão.

DILI, 13 janeiru 2020 (TATOLI) – Konsellu-Ministru (KM) aprova ona Dotasaun Orsamentál Temporária (DOT) ba janeiru 2020 ho montante millaun $116,4.

“Ohin aprova dekretu ezekusaun ba Dotasaun Orsamentu Temporária ba fulan-janeiru 2020 no fiksa montante”, Ministra Finansa interina, Sara Lobo Brites, informa iha konferénsia imprensa hafoin soru-mutu KM iha salaun enkontru Ministériu Finansa, Aitarak-laran, ohin, ne’ebé hetan akompaña mós hosi Ministru Estadu Prezidénsia Konsellu Ministru, Agio Pereira.

Ministra Finansa en-ezersísiu, Sara Lobo Brites. Imajen Tatoli/ Egas Cristovão.

Atuál Vise-Ministra Finansa afirma, montante DOT ba janeiru 2020 ho valór millaun $116.4 ba kategoria haat (kategoria sira mak saláriu no vensimentu, sasán no servisu, transferénsia públika no kapitál dezenvolvimentu) la inklui kapitál menór.

“Tuir diskusaun ohin, karik dekretu ne’e públika ohin maka Ministériu Finansa halo distribuisaun ba kada instituisaun nune’e bele hahú ezekuta ona DOT iha fulan janeiru nian”, dehan.

Dekretu Governu ne’e aprezenta hosi Ministra Finansa ein funsaun, Sara Lobo Brites, ba orsamentu doudésimu sura hosi prosesu aprovasaun proposta lei ba Orsamentu Jerál Estadu (OJE) ba tinan 2020 seidauk konklui no la tama vigór iha 1 janeiru 2020.

Dekretu Governu ida ne’e mai aprova ho abrigu lei númeru 13/2019, altera hosi lei númeru 9/2011 no 3/2013, konjuntu hosi norma ne’e atu disiplina aplikasaun rejime doudesimál.

Diploma ida ne’e, hahú iha 1 janeiru 2020 no remata automatikamente bainhira OJE ba 2020 tama iha vigor.

Regra no prosedimentu aplikasaun rejime duodésimu, instituisaun Estadu hotu presiza prepara DOT bazeia ba prinsípiu rua mak hanesan; dotasaun orsamentál kobre de’it despeza ida durante períodu la liu fulan ida no dotasaun orsamentál labele liu um doze avos (1/12) husi orsamentál ne’ebé define tiha ona tuir lei orsamentál jerál Estadu númeru 13/2016.

Notísia relevante : Transferénsia DOT Tarde Ladún Fó Impaktu

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here