Tékniku Viveiru Permanente hosi Diresaun Nasionál Floresta Maubara, Paulino Sampaio. Imajen/Egas Cristovão.

MAUBARA, 15 novembru 2019 (TATOLI) — Diresaun Jerál Floresta (DJF) liuhosi Viveiru Permanente Maubara, Munisípiu Liquiçá, oras ne’e prepara ona ai-oan rihun 300 hodi distribui iha 2020.

Tékniku Viveiru Permanente hosi Diresaun Nasionál Floresta Maubara, Paulino Sampaio, hateten ai-oan iha fatin refere barak ho kuda ai espésie mahoni, teka, ai-saria. Prosesu kuidadu ai-oan ne’e hahú iha jullu hafoin tama ba preparasaun foti rai-metan. Tama janeiru halo ona lansamentu ba ai-oan ne’ebé preparadu atu fahe.

Rai-metan iha oin haat hanesan karau-teen, hare-kulit, rai baibain no adubu orgániku. Rai-metan ne’e foti hosi parte Loes no Faulara.

Bainhira rai-metan preparadu ona entaun tama ona ba kuda ai-musan ba plástiku. Ai-musan ne’e la hanesan, balun moris lalais no balun moris kleur. Ai-musaun sosa de’it hosi komunidade iha Balibo no iha territóriu Liquiçá rasik.

“Ami iha alvu tinan 2019 ne’e ami prepara ona ai-oan rihun 300 hodi fahe ba munisípiu hotu-hotu iha 2020, 2019 mós ami prepara rihun 300 no fahe hotu ona, 2018 ne’e ami halo de’it rihun 120 ba ai-oan”, Tékniku hosi Viveiru Permanente Maubara ne’e informa ba Ajénsia Tatoli iha Vatuvou, Maubara, kinta ne’e.

Nia hatutan, iha 2017, sentru viveru permanente ne’e prodús ai-oan rihun 400-resin, ne’e barak liu ona.

Purtantu Sentru Viveiru Permanente ne’e iha kampaun ai-horis haat. Kampaun ida kuda ai espésie mahoni ho ai-saria, kampaun daruak kuda ai urbana ho ai-fuan hanesan abakate, kulu jaka, sirsak, ai-dila no iha tan ai-urbana seluk hanesan ai-kale, marungi no sabraka.

Kampaun datoluk kuda ai-urbana hanesan nimba, ai-akásia, gamal no lamtoro. Iha kampaun dahaat kuda espésie hali Portugál, ai-kakeu no mahoni.

Nia haktuir, kada tinan sosa fini ai-musan dala-ida, loloos ne’e kompañia mak kompra, maibé prosesu kleur liu, entaun sentru ne’e mak sosa rasik de’it. Sentru Viveiru sosa ai-musan kada kilo $5.

“Atu foti ai-oan ba prienxe formatu iha diresaun no aprova hosi diresaun hafoin mai foti ai-oan iha Maubara. Ne’e fahe gratuita”, katak nia.

Sentru Viveiru Permanente iha ema na’in-hitu, kategoria traballadór bens no servisu iha na’in-tolu, kontratadu salariál na’in-tolu no permanente na’in-ida.

Nia dehan, emprezáriu, Organizasaun Naun Governamentál (ONG) no komunidade mak hatama proposta hodi foti ai-oan ne’e.

Hodi haktuir, munisípiu ne’ebé hatudu rezultadu di’ak ba kuda ai-oan mak hanesan Bobonaro, Aileu, Ainaro no Baucau, maibé parte Manauto nian maioria ai-oan mak mate hotu. Ai ne’ebé distribui ai komersiál hanesan mahoni no ai-saria.

Sentru Viveiru Permanente ne’e mós hetan peskija hosi estudante sira Universidade Nacional Timor Lorosa’e liuhosi Departamentu Agronomia. Sentru ne’e ho ektare 5,2.

Sentru Viveiru Permanente ne’ebé lokaliza iha área Ediri, Suku Vatuvou, Postu Administrativu Maubara, Munisípiu Liquiçá estabelese dezde 2008.

Jornalista : Evaristo Soares Martins
Editora : Maria Auxiliadora

HAKEREK NO HATÁN

Please enter your comment!
Please enter your name here