Estudante no profesór hasai foto hamutuk, iha ámbitu komemorasaun loron mundiál ba labarik. Imajen: Felicidade Ximenes

COVALIMA, 10 janeiru 2020 (TATOLI)—Vise-Ministru Edukasaun Juventude no Desportu, João Zacarias, hateten Ministériu Edukasaun, Juventude no Desportu (MEJD) iha ona planu ba 2020 atu identifika kualidade profesór sira iha territóriu Timor laran tomak hodi bele tulun estudante sira atu dezenvolve no kapasita ninia an ho di’ak liután.

Tanba, nia hatutan, profesór ida bainhira hatudu ninia koñesimentu no abilidade di’ak sei sai motivedór diak ba alunu sira. Tanba, nia dehan, estudante balun hakarak estuda makaas no aprende di’ak liután tanba gosta, apresia no simpatia ba profesór refere.

Nia hateten, bainhira profesór ne’ebé la di’ak, la hatudu ninia kapasidade no koñesimentu ho pedagozia fraku sei labele ajuda estudante sira atu aprende ho di’ak.

“Tanba ne’e, iha 2020 ne’e, ita sei esforsu atu eleva liután kualidade profesór sira-nian hodi bele atinji meta ne’ebé ita planeia ona. Tanba profesór sira mak sai elementu ne’ebé importante atu kontribui no asegura kualidade edukasaun ba oin. Tanba ne’e, ministériu iha ona planu atu identifika kualidade profesór sira iha territóriu Timór laran tomak,” Vise-Ministru João Zakarias dehan ba jornalista sira iha salaun eskola Ensinu Sekundáriu Jerál Públiku (ESGP) Suai, sesta (10/1/2020).

Ne’eduni, nia hatutan, relasiona ho papél importante profesór sira-nian hodi hadi’a kualidade no aprendizajen papél INFORDEPE nian liuhusi responsabilidade formasaun sira ne’e, MEJD iha espetativa boot ba instituisaun formasaun sei halo servisu ho di’ak.

Formasaun refere, nia esklarese, atu hadi’a liután sistema formasaun ne’e hodi bele ajuda manorin na’in sira atu eleva sira-nia kualidade liuhusi ámbitu koñesimentu.

Tanba ne’e, nia husu ba profesór sira buka hakaas an atu lori kualidade ida di’ak iha área edukasaun tanba edukasaun mak sai iis ba rai ida ne’e.

Notísia relevante:Profesór Sira Obedese Ba Kompeténsia Haat

Jornalista : Tomé Amado

Editór       : Rafy Belo

HAKEREK NO HATÁN

Please enter your comment!
Please enter your name here