DILI, 09 janeiru 2020 (TATOLI)-Sentru Formasaun Jurídika no Judisiál (CFJJ-sigla portugés) to’o ohin seidauk halo prosesu rekrutamentu ba formandu Timoroan 45 hodi tuir formasaun iha área direitu atu sai Juíz, Defensór Públiku no Prokuradór.
Tuir Diretór CFJJ Antonino Gonçalves, katak prosesu rekrutamentu seidauk la’o tanba sei kontinua hein despaixu ofisiál hosi governu liuhosi Ministériu Justisa.
Tuir loloos iha tinan 2019, Sentru formasaun ne’e loke ona prosesu rekrutamentu ba formandu sira maibé tenke adia ba tinan ne’e tanba governu sei halo aprovasaun ba lei orgánika no rejime atividade CFJJ nian.
Notísia Relevante:SFJJ Sei Rekruta Formandu Judisiál
“Ha’u hanoin tinan kotuk sira aprova tiha ona lei tolu mak hanesan rejime atividade CFJJ, estrutura orgánika CFJJ no autorizasaun kuadru pessoál Ministeriu Públiku nian, maibé to’o agora seidauk hetan despaixu ruma husi Ministru Justisa tanba Prezidente Repúblika seidauk promulga no dekreta iha jornal da Repúblika,”informa Diretór CFJJ ba TATOLI, iha Caicoli,ohin.
Antonino Gonçalves, dehan tan, bainhira Xefe Estadu promulga tarde lei rua refere sei prezudika instituisaun ne’e hodi loke prosesu inskrisaun ba kandidatu formandu foun hodi hahú tuir ona formasaun iha tinan 2020.
Tuir planu CFJJ sei rekruta kandidatu hamutuk na’in 45, kompostu hosi Juíz na’in 15, Defensór Públiku na’in 15, no prokuradór na’in 15.
Maibé nia realsa katak prosesu rekrutamentu sei akontese bainhira Prezidente Repúblika promulga ona lei ne’e, no hetan ona despaixu ofisiál hosi Ministru Justisa, Manuel Carcéres da Costa.
Jornalista : Domingos Piedade Freitas
Editór :Francisco Simões