Serimónia entrega mákina prosesamentu sorghum husi Sekretáriu Estadu Kooperativa Arsénio Pereira da Silva ba MOKATIL. Imajen/Natalino Costa.

DILI, 08 janeiru 2019 (TATOLI) – Sekretáriu Estadu Kooperativa (SEKoop), Arsénio Pereira da Silva, entrega ona mákina prosesamentu sorghum ka batar ain-naruk hamutuk unidade 152 ba Movimentu Kamponeza Timor-Leste (MOKATIL) atu hahú halo prosesamentu iha tinan ida ne’e.

SEKoop Arsénio Pereira da Silva iha ámbitu entrega simbólikamente mákina prosesamentu ne’e husu ba MOKATIL atu kuidadu ekipamentu sira ne’e ho di’ak no uza mákina sira tuir interese grupu MOKATIL nian hodi komunidade bele hetan benefísiu.

“Ha’u lakohi mákina ne’e depois de entrega ita-boot sira uza fali ba ida-idak nia interese, maibé tenke uza tuir interese movimentu kamponeza nian ba prosesamentu batar Kay Rala (sorghum) nune’e ema seluk mós hetan benefísiu”, nia dehan ba jornalista sira hafoin entrega mákina ne’e iha Beduku-Manleuana, ohin.

SEKoop fiar ho mákina prosesamentu ne’e, MOKATIL sei halo produsaun barak ba sorghum ne’ebé MOKATIL rasik promete ona.

“Ha’u fiar ho mákina ida ne’e, ita sei iha aumentu husi produsaun batar Kay Rala, tanba MOKATIL esforsu atu atinje tuir saida maka MOKATIL deklara ona katak sei ajuda Estadu atu hasa’e produsaun sorghum liuhusi produsaun indústria integrada ba batar Kay Rala hodi bele sai hanesan hahán alternativa”, governante ne’e dehan.

Tanba iha 2019, MOKATIL foku liu ba iha fini batar Kay Rala nia, maibé tinan ida bele halo produsaun. “Ha’u hanoin ho mákina sira ne’ebé iha, ita hahú halo ona produsaun ba batar Kay Rala tanba iha ona mákina prosesamentu ne’ebé sufisiente”, katak.

Nune’e, SEKoop husu ba MOKATIL tenke sériu tanba mákina sira ne’e uza osan Estadu, utiliza duni ba interese ne’ebé bele benefisia ema seluk, labele uza sasán sira ne’e hodi hadau malu tanba Governu nia esforsu maka buka apoiu hodi tulun grupu ka movimentu sira.

Governante ne’e hatutan ekipa SEKoop sei halo monitorizasaun ba mákina sira ne’e hodi observa katak uza duni ba halo prosesamentu ka lae.

Iha fatin hanesan, Prezidente MOKATIL, Hélio Sores da Silva, lori movimentu kamponeza nian naran agradese ba SEKoop tanba bele prevee ona osan hodi ajuda MOKATIL hola mákina prosesamentu batar ain-naruk nian.

Tanba ne’e, nia parte kompromete sei hamutuk ho komité baze MOKATIL atu uza mákina ba duni prosesamentu sorghum nian no ho mákina sira ne’e MOKATIL sei esforsu makaas hodi halo prosesamentu ne’ebé barak liután.

Mákina sira ne’e provizóriu sei rai iha armazein iha Beduku-Manleuana nian no aban-bainrua MOKATIL estabelese sentru prosesamentu iha munisípiu maka sei rai iha fatin sira ne’e.

Entretantu, orsamentu sosa mákina prosesamentu sorghum unidade 152 hamutuk rihun $616, ne’ebé SEKoop prevee ba iha atividade MOKATIL nian ho montante rihun $885 husi orsamentu 2019.

Mákina ne’e hola husi Indonézia ho tipu oioin hanesan dulas sorghum sai batar, foos, jus no ba prosesamentu seluk tan.

Notísia relevante : To’os-Na’in Espera Sorghum Folin Iha Merkadu

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here