Ministru Defeza no Ministru Interiór Interinu, Filomeno da Paixão de Jesus. Imajen/Tatoli

DILI, 08 janeiru 2020 (TATOLI)- Alokasaun orsamentu jerál Estadu (OJE) tinan fiskál 2020 ba Ministériu Defeza (MD) ho Komandu FALINTIL-Forsa Defeza Timor-Leste (F-FDTL) hamutuk millaun $38,456.

Notísia Relevante : MD Ezekuta Ona OJE 2019 Porsentu 64.3

Total orsamentu ne’e fahe ba saláriu no vensimentu millaun $10.381, bens no servisu millaun $25,920, transferénsia públika 0 (zero), kapitál menór millaun $2,056 no kapitál dezenvolvimentu rihun $100.

Proposta orsamentu foun ne’e aprezenta husi Ministru Defeza, Filomeno da Paixão de Jesus ho Komandu F-FDTL ba Komisaun B Parlamentu Nasionál ba asuntu Defeza, Seguransa no Negósiu Estranjeiru, kuarta (08/01/2020).

Ministru Defeza, Filomeno da Paixão  de Jesus, esplika, iha proposta OJE 2020 ne’ebé antes ne’e aprezenta ba Komisaun Revizaun Orsamentu Polítika (KROP) prevee uluk millaun $17, maibé governu halo redusaun fila fali ba millaun  $3-resin.

“Orsamentu ba Ministériu Defeza nian ho montante millaun $17 no ko’a tiha millaun $3, maibé F-FDTL de’it maka la iha redusaun mantein ho millaun $24,” informa Ministru Filomeno Paixão ba jornalista iha Parlamentu Nasionál.

Nia dehan, redusaun orsamentu ne’e afeta ba programa balun ne’ebé Ministériu Defeza atu implementa iha tinan 2020.

Iha fatin hanesan, Prezidente Komisaun B Parlamentu Nasionál, Adérito Hugo da Costa dehan, OJE ba Ministériu Defeza nian sira haree ladún prioridade, nune’e ko’a de’it millaun $3, no F-FDTL nian la ko’a, tanba F-FDTL presiza fundus atu reforsa servisu no programa ne’ebé atu apoiu servisu seguransa no dezenvolvimentu F-FDTL nian.

“Ministériu Defeza nian orsamentu maka sofre kortés millaun $3 maibé F-FDTL nian la sofre kortés ida tanba sira presiza duni orsamentu atu suporta servisu no nesesidade instituisaun nian,” hateten Aderito Hugo.

Komisaun B PN mós apresia Komandu F-FDTL hetan suporta fundus no fasilidade servisu husi parseiru dezenvolvimentu sira hodi haforsa F-FDTL iha área rekursu umanu no ekipamentu nian ne’ebé prioridade tebes atu dezenvolve F-FDTL ba futuru.

Jornalista  : Eugénio Pereira 

Editór        : Francisco Simões

HAKEREK NO HATÁN

Please enter your comment!
Please enter your name here