Ministru Defeza no Ministru Interiór Interinu, Filomeno da Paixão de Jesus. Imajen/Tatoli

DILI, 29 outubru 2019 (TATOLI)-Hosi Janeiru to’o Outubru, tinan ne’e,  Ministériu Defeza (MD) ezekuta ona Orsamentu Jerál Estadu (OJE) tinan fiskál 2019 nian porsentu 64.3.

Tuir relatóriu ezekusaun OJE Ministériu Defeza nian ne’ebé públika iha Portál Transparénsia Governu Timor-Leste, katak OJE ho orijen alokadu ba MD ho montante $1,478,983,976.00, kompromisu sira, $99,945,141.52, obrigasaun sira, $124,203,157.15, atuál, $827,223,426.58, saldu $427,591,256.25 no totál ezekusaun 64.3%.

Ministru Defeza, Filomeno da Paixão de Jesus, garante katak, to’o Dezembru nia rohan, ministériu ne’ebé nia lidera sei termina nia ezekusaun to’o porsentu 100.

“Ha’u fiar too dezembru sei sa’e tuir tarjetu ezekusaun,” afirma Ministru Filomeno  Paixão ba jornalista, ohin, hafoin aprezenta programa no orsamentu ba Komisaun B Parlamentu Nasional ba  asuntu Defeza, Seguransa no Negósiu Estranjeiru iha Parlamentu Nasionál.

Iha audiénsia ho Prezidente Komisaun B Parlamentu Nasionál, Aderito Hugo da Costa, Ministru Defeza Filomeno ho ekipa diretór akompaña hosi Xefe Estadu Maiór Jenerál FALINTIL-FDTL, Majór Jenerál Lere Anan Timur aprezenta mós planu polítika Defeza  iha OJE 2020 no ezekusaun OJE 2019 nian.

Komisaun B no Ministériu Defeza kontinua diskute mós planu programa prioridade defeza nian ne’ebé Konsellu Ministru aprova ona maka rekrutamentu membru F-FDTL na’in 600 iha tinan 2020 ne’ebé sei koloka forsa barak liu hala’o seguransa iha tasi Kosta Súl ba oin hodi garantia seguransa iha tasi Timor-Leste no diskute mós planu programa prioridade seluk tan.

Antes ne’e iha sesta (25/10) liubá, Ministru Defeza no Ministru Interior interinu, Filomeno Paixão ho Sekretáriu Estadu Protesaun Sivíl, Alexandrino Xavier de Araújo no diretór sira no Komandante Jerál PNTL, Komisáriu Polisia Faustino da Costa hala’o mós audiénsia ho Komisaun B hodi aprezenta sekuénsia kona-ba ezekusaun OJE 2019 no planu programa prioridade ba OJE 2020 nian.

OJE 2019 ba Ministériu Interior nian ho orijen, $1,478,983,976.00, kompromisu sira $99,945,141.52, obrigasaun sira, $124,203,157.15, atuál  $827,223,426.58, saldu $427,591,256.25 no ezekusaun 64.3%.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here