Prezidente Autoridade RAEOA-ZEESM, José Luís Guterres ‘Lugu’. Imajen Tatoli/António Gonçalves.

DILI, 07 janeiru 2020 (TATOLI) – Proposta orsamentu foun 2020  ba Rejiaun Administrativa Espesiál Oe-Cusse Ambeno (RAEOA) no Zona Espesiál Ekonomia Sosiál Merkadu hamutuk millaun $127.206.

Husi montante ne’e fahe ba kategoria saláriu no vensimentu hamutuk millaun $8.819, bens no servisu millaun $14.484, transferénsia públika millaun $2.783, kapitál menór rihun $520, no kapitál dezenvolvimentu millaun $100.599.

Prezidente RAEOA, José Luis Guterres, hatete osan sira ne’e sei kontinua obra ne’ebé hala’o tiha ona no obra foun ne’ebé tenke halo hanesan dezenvolve zona rurál no bee-moos iha Oe-Cusse no Ataúro.

“Orsamentu ne’ebé aloka ba iha kapitál dezenvolvimentu atu utiliza ba iha kontinuasaun obra ne’ebé hala’o ona hanesan estrada balu, protesaun ba aeroportu hanesan halo moru, no proteje aeroportu hosi tasi, no halo tan buat seluk nune’e ICAO (Organizasaun Internasionál Aviasaun Sivíl) bele atribui sertifikadu nivel internasionál nune’e aviaun hosi rai seluk bele tun ona iha rai Oe-Cusse”, Lugu afirma iha Parlamentu Nasionál, ohin.

Prezidente subliña, prioridade ne’ebé sei halo iha 2020 maka investe iha sub rejiaun tolu iha RAEOA, ne’ebé durante ne’e seidauk sente dezenvolvimentu, maski Oe-Cusse iha ona estrada, aeroportu, portu no ponte, maibé povu baibain seidauk iha liuliu bee-moos.

“Ami promete de’it katak osan ne’ebé aloka ba RAEOA sei utiliza hodi benefisia povu”, Lugu garante.

Entretantu, iha Proposta Orsamentu Jerál Estadu (OJE) 2020 ne’ebé antes ne’e ho montante $1,950 ne’ebé Governu aprezenta iha Parlamentu Nasionál no iha diskusaun jeneralidade ba loron daruak iha 3 dezembru 2019, Primeiru-Ministru, Taur Matan Ruak, deside retira ne’e, alokasaun orsamentu ba RAEOA no ZEESM hamutuk millaun $26.

Husi montante ne’e kompostu hosi kategoria saláriu no vensimentu millaun $8,818 (%33,8), bens no servisu millaun $14,483 (%55,5) no transferénsia públika millaun $2,783 (%10,7), enkuantu alokasaun ba kapitál menór no kapitál dezenvolvimentu laiha.

Nune’e, montante orsamentu iha proposta OJE antes 2020 ba rejiaun espesiál ne’e, tun porsentu 66 kompara ho OJE 2019, ne’ebé ho montante millaun $76 no alokadu ba kategoria hotu.

Alokasaun orsamentu 2019 ba RAEOA-ZEESM, kategoria saláriu no vensimentu millaun $8,818, bens no sevisu millaun $14,483, kapitál menór millaun $1,697, kapitál dezenvolvimentu millaun $47,216, transferénsia públika millaun $2,783 no fundu kontijénsia millaun $1.

Notísia relevante : Arsénio Rekoñese Ezekusaun Orsamentu RAEOA Defísil Tanba Transferénsia Tarde

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here