Xefe Gabinete Primeiru-Ministru, Afonso Corte Real. Imajen Tatoli/Cipriano Colo

DILI, 06 janeiru 2020)–Audiénsia públika entre Komisaun D Parlamentu Nasionál (PN) ho Gabinete Primeiru-Ministru (GPM), deputadu sira sujere atu orsamentu ne’ebé aloka ba Expo Dubai mantein ho montante millaun $2,1, maski akontese redusaun ba Orsamentu Jerál Estadu (OJE) 2020.

Hafoin audiénsia iha sala Komisaun D, Parlamentu Nasionál, ohin, Xefe Gabinete Primeiru-Ministru, Afonso Corte Real hateten orsamentu ba expo Dubai mantein tanba pedidu husi parte Ministériu Finansa no deputadu sira balun mak sujere.

“Orsamentu ba Expo Dubai ne’e mantein tanba husi parte Ministériu Finansa no mós deputadu sira balun mak sujere. Orsamentu ida-ne’e importante tanba hanesan únika área ida-ne’ebé bele hatudu Timor-Leste ba mundu. Ida-ne’e presiza duni, maski ho orsamentu ne’ebé boot tanba rai ne’ebá vida karun, sasán sira mós karun, ho nia operasaun durante fulan neen kedas. Tanba ida-ne’e mak sira konsidera katak tenke husik atu bele uza nafatin fundu ida-ne’e. Liután ida-ne’e, kuaze nasaun sira husi mundu tomak ba hotu iha Dubai. Loos duni, ema Árabe sira oferese ona sasán balun ba ita atu bele hatudu iha expo ne’e, maibé ita mós tenke kontribui uitoan”, Afonso hateten.

Maski nune’e, Afonso mós seidauk garante atu mantein tanba sei diskute tan iha Parlamentu Nasionál, nune’e, to’o iha Parlamentu Nasionál mak bele haree ninia finalidade.

Orsamentu ne’e tama iha kategoria bens no serbisu atu Timor-Leste Partisipa iha Expo Dubai ne’ebé sei jere husi Gabinete Primeiru-Ministru.

Antes ne’e, Governu nomea ona Francisco Kalbuadi Lay nu’udár autoridade Timor-Leste nian ba Expo Dubai.

Espozisaun mundiál ne’e sei partisipa husi nasaun kuaze 192 ne’ebé sei hala’o iha Dubai, Uni Emirat Arab, hahú iha 20 outubru 2020 to’o 10 abríl 2021.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here