Ekipamentu ou teknolojia modernu ho naran Amplified Geochemical Imaging (AGI) ne’ebé Institutu Petróleu no Jeolojia (IPG,sigla portugés) uza ba peskiza Mina no Gás. Imajen/ espesiál.

DILI, 30 dezembru 2019 (TATOLI) – Institutu Petróleu no Jeolojia (IPG, sigla portugés) finaliza ona instalasaun Amplified Geochemical Imaging (AGI) ou ekipamentu ida ne’ebé ligadu ho kímiku iha bloku C.

“IPG finaliza ona instalasaun ekipamentu AGI iha block C ne’ebé lokaliza iha Postu Administrativu Laga no Baguia, Munisípiu Baucau, daudaun ne’e ekipa téknika kolekta filafali iha block A”, Xefe Unidade Petróleu no Gás, Joanico Pires, via mídia sosiál ba TATOLI, ohin.

Joanico Pires hatutan bloku A ne’e kompostu hosi Postu Administrativu Vemasse no Venilale Munisípiu Baucau nian no Postu Administrativu Ossu Munisípiu Viqueque ne’ebé durasaun module AGI refere to’o ona loron 21.

“Iha block A ekipa sei kolekta ou retrieval fali sei lori tempo loron tolu, hahú iha loron 3 to’o 5 janeiru 2020, hanesan mós bloku B ekipa sei kolekta filafali iha loron 6 to’o 16 janeiru 2020 no iha bloku C ekipa mai halo kolekta fali iha loron 17-20 janeiru 2020 no iha 21 janeiru ekipa sei fila bá Dili hodi kontinua halo relatóriu kampu no mós hein rezultadu analiza laboratóriu”, Joanico Pires informa.

Tuir Xefe Unidade Petróleu no Gás, module sira sei halo analiza iha Amérika ho durasaun tempu fulan ida to’o tolu.

“Rezultadu analiza ne’e iha ona ekipa sei kontinua interpreta hodi nune’e bele define área poténsia bazeia ba rezultadu laboratóriu liuhusi anomali map ne’ebé aas no konsidera hanesan poténsia ba mina no gás no ikus liu submete ba relatóriu ikus ba atividades survey nian”, katak.

Entretantu, finalizasaun ba instalasaun module AGI iha bloku A hamutuk 36, iha bloku B hamutuk 73 no iha bloku C hamutuk module 32.

Ekipamentu AGI nu’udar teknolojia moderna ne’ebé utiliza ba esplorasaun jeokímika hodi identifika mina, gás liuhusi migrasaun microseepage, indika ho kímika analítika husi C2 to’o C20 iha fatuk jeradór ou fatuk rezervatóriu.

Estudu ne’e nu’udar kontinuasaun ba estudu sistema petróleu ne’ebé hala’o iha área refere iha 2016 to’o 2017 no hatudu rezultadu ne’ebé di’ak ba konsentrasaun petróleu no gás.

Notísia relevante : IPG Instala Module hodi Identifika Mina no Gás iha Quelicai

Jornalista : Antónia Gusmão
Editora : Maria Auxiliadora

HAKEREK NO HATÁN

Please enter your comment!
Please enter your name here