Ekipa Institutu Petróleu no Jeolojia hasai foto hamutuk antes tun bá terrenu instala module hodi identifika mina no gás iha Postu Administrativu Quelicai, Munisípiu Baucau, Kinta, 19 dezembru 2019. Imajen/Antónia Gusmão.

QUELICAI, 19 dezembru 2019 (TATOLI) – Institutu Petróleu no Jeolojia (IPG, sigla portugés) monta module Amplified Geochemical Imaging (AGI) hodi identifika mina no gás iha rai-okos iha Bloku B, área Postu Administrativu Quelicai nian.

Bloku B ne’e kobre husi Postu Administrativu Watulari-Viqueque, Munisípiu Baucau mak Quelicai no Postu Baukau.

Xefe Unidade Petróleu no Gás, Joanico Pires, informa antes ekipa téknika sira instala module iha área sira ne’ebé identifikadu, halo uluk peskiza.

“Iha terrenu ekipa planeia ona atu tau pontu ne’ebé maka ami monta ona bazeia ba dadus ne’ebé antes estudu ne’e ami halo tiha ona, ne’ebé la’ós primeiru, más hala’o ba faze dala tolu ona ba rai-leten, ne’ebé ami konsege realiza no rezultadu analiza jeokímika ne’ebé liu tiha ona, entaun hosi faze ida ne’e ami kontinua ba rai-okos, tanba iha rai-leten indika ona. Agora daudauk ami lori métodu jeokímika hodi hatene iha rai-okos ne’e indika duni mina no gás ka lae”, Xefe Unidade Petróleu no Gás haktenik iha Postu Administrativu Quelicai, Munisípiu Baucau, ohin.

Nia hatutan antes ne’e, mós ekipa IPG halo uluk ona estudu hahú hosi Postu Administrativu Baguia, Laga, Quelicai parte balu no iha Postu Administrativu Ossu.

“Iha fatin sira ne’e, ekipa halo ona estudu no foti ona amostra, rezultadu hosi amostra sira ne’e tanba indika ho dadus laboratóriu ne’ebé maka di’ak, entaun ami kontinua estudu ho métodu jeokímika”, katak.

Ekipa sira ne’ebé halo estudu mai hosi ekipa téknika tolu hanesan; Unidade Petróleu no Gás na’in-tolu, voluntáriu na’in-hitu hosi FDCH ho objetivu atu kapasita sira nia-an ligadu ho servisu iha terrenu.

IPG hahú instala ekipamentu AGI ne’e iha 13/12/2019 ho nia objetivu atu hatene ezisténsia idrokarbonu iha rai okos, atividade kalibrasaun ba posu abandona no sampeling mina no gás ba bloku tolu mak Bloku A kompostu husi Vemasse, Venilale iha munisípiu Baucau no Ossu iha Viqueque.

“Totál pontu iha Bloku A 36 ne’e, ami instala hotu tiha ona. Agora, ami tama iha Bloku B ne’e maka kompostu husi Postu Watulari, Quelicai no mós Baucau”, salienta.

Daudaun ekipa instala ona ekipamentu ne’e iha parte Quelicai no totál pontu iha Bloku B 31 ona, no kontinua instala ba loron ohin entaun hamutuk pontu 41, enkuantu iha parte Watulari nian remata ona no tuirmai kotinua bá parte Seiçal-Baucau nian.

Tuir planu, instalasaun ekipamentu iha Bloku B ne’e durante loron hitu nia laran no iha 29 to’o 30 dezembru, ekipa sei kontinua instala iha bloku C ho lokalidade Laga no Baguia ho totál pontu 32. Entretantu atividade retrieval ou foti fali module AGI hahú iha 4 to’o 21 janeiru 2020.

Peskiza ne’e halo durante fulan 6 hahú iha loron 10 dezembru 2019 no remata iha juñu 2020, maibé atividade kuda no mós hasai instrumentu AGI iha terrenu ne’e hala’o durante loron 42.

Ekipamentu AGI nu’udar teknolojia moderna ne’ebé utiliza ba esplorasaun jeokímika hodi identifika mina, gás liuhusi migrasaun microseepage, indika ho kímika analítika husi C2 to’o C20 iha fatuk jeradór ou fatuk rezervatóriu.

Estudu ne’e nu’udar kontinuasaun ba estudu sistema petróleu ne’ebé hala’o iha área refere iha 2016 to’o 2017 no hatudu rezultadu ne’ebé di’ak ba konsentrasaun petróleu no gás.

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here