DILI, 27 dezembru 2019 (TATOLI)—Jeitu hakerek la’os maihusi kedah (bakat) maibé maihusi vontade, disiplina no kreatividade atu hakerek no hakerek. Hakerek tanba hakerek, tanba hakerek ne’e rasik suli nanesan bee husi ema ida-nia kapasidade no kreatividade hodi homan-tutan liafuan seluk ba ida seluk sai metin ho magarti ida be nunka atu mate no mate tan.

 Ida ne’e mak akontese ba jornalista no hakerek-na’in livru “Tatoli Nia Ain-Le’ut” no livru fotografia Lalatak”, Rafael Ximenes “Rafy” Belo no Cancio “Cassimata” Ximenes. Rafael Ximenes “Rafy” Belo finaliza nia estudu iha Universidade Nacional Timor Lorosa´e (UNTL), iha Fakuldade Siénsia Sosiál (FSS), Departamentu Komunikasaun Sosiál iha 2017. Hahú 2016 to´o 2019, nia nu´udar jornalista iha embriaun Agência TATOLI,IP. Iha Jullu 2019, promovidu ba editór no responsavel ba desk nomós sai editór ba notísia ho lian Portugés iha TATOLI,IP to´o ohin loron.

Antes ne’e, iha 2012-2013, nia hetan oportunidade sai nu´udar estudante Erasmus hodi estuda kona-ba Komunikasaun no Kultura, iha Universidade Católica Portuguesa (UCP), Lizboa, Portugál. Hafoin estudu ramata, nia fila mai Timor-Leste hodi sai Konsultór Língua ba Jornalista sira, liuhusi programa ida husi UE (União Europeia) iha Timor-Leste (2014).

Tanba haree ba vontade no esperiénsia hirak ne’e, tuirmai nia hetan tan oportunidade ida husi Fundação Oriente hodi bá kontinua ninia estuda iha Universidade Coimbra (UC), Portugál. Iha universidade refere, nia hetan oportunidade hodi estuda tan buat foun kona-ba Língua no Kultura Portugeza (2014-2015).

Tanba hadomi liu atividade lee no hakerek, mak bainhira nia sai estudante ativu iha Universidade Nacional Timor-Leste (UNTL), nia badinas hakerek artigu sira kona-ba edukasaun no komunikasaun, poezia no istória-badak sira, hodi publika iha Jornál Semanál Akadémika no dalaruma transmite mós liuhuai Rádiu Akadémika (90.00 Mhz) UNTL nian.

Ho espíritu hakerek ne´ebé maka´as, bainhira hetan oportunidade estuda iha UCP no UC Portugál, kontinua hakerek kona-ba edukasaun no komunikasaun, poezia no istória-badak inklui mós notísia sira hodi kontribui ba Jornál Diáriu Timor Post no mós media online ida ho naran www.artistimor.com, inklui eskrita literária sira hodi publika iha Jornál Semanál Matadalan no Jornál INDEPENDENTE. Dala balun mós, publika iha revista RTK (Rádiu Timor Kmanek).

Sees husi atividade hirak ne’e, nia sai mós dosente konvidadu voluntáriu iha Universidade Orientál Timor Lorosa´e (UNITAL), iha Departamentu Komunikasaun Sosiál, Iha ne’eba, nia hanorin matéria kona-ba Jestaun Mídia, Reportajen no Eskrita, Téknika Produsaun no Tranzmisaun Televiziva, Metodolojia Peskiza no Analiza Mídia (2017).

Antes fahe esperiensia liuhusi hanorin, nia mós tuir ona formasaun jestaun ajénsia notisioza iha Lembaga Pers Dr. Soetomo (LPDS) Jakarta-Indonézia (2016). Nune´e mós, produsaun notísia espesializada ba ajénsia notisioza iha CENJOR (Centro Protocolar de Formação Profissional para Jornalistas) iha Lizboa, Portugál (2016). Partisipa mós iha kursu língua ba jornalista sira oferese husi Instituto Camões parseria ho Sekretáriu Estadu Komunikasaun Sosiál (SEKOMS) ho Nivel B2+.

Iha TATOLI, aleinde editór no responsavel desk, ajuda mós halo dezeñu gráfiku no produtór ba vídeo ho lian portugés hanesan Media Na Educação no KFH (Klibur Foinsa´e Humanitária) no seluk tan.

Lisan be seluk no toman be keta-ketak, maibé, jornalista nia toman ida mak mout iha atividade lee no hakerek. Tanba ne’e, wainhira fó oportunidade atu hakerek livru, Cancio “Cassimata” Ximenes, nahohuk simu responsabilidade boot ida ne’e. Cancio “Cassimata” Ximenes akaba nia estudu iha Universidade da Paz (UNPAZ) iha fulan-Dezembru 2017. Iha 28 Dezembru 2017, nia lansa nia livru dahuluk antolojia Istoria-Badak (Isba) ho titulu “Eroi Loromatan”. Daudaun ne’e, nia haknaar-an nu’udar jornalista iha Agência TATOLI,IP.

Uluk liu, nia tuir formasaun jornalizmu báziku “Program Pendidikan Dasar Jurnalistik Angkatan ke-6 (PPDJ-6)” durante fulan neen [Maiu-Outubru 2001] iha Lembaga Pers Dr. Soetomo (LPDS) Jakarta-Indonézia. Ho bukae ida ne’e, otodidakmente, nia badinas hakerek artigu sosiál polítika, poezia, no istória-badak sira hodi publika iha Jornál Suara Timor Lorosa’e (STL), Timor Post, Diário Nacional, Vox Populi, Time Timor, OASIS, FINI, Falur, no Jornál Semanál Matadalan.

Ho esperiénsia hakerek poezia no istória-badak, iha loron 12-16 Maiu 2010, nia reprezenta hakerek-na’in Timor-Leste hodi ba tuir eventu Internasional Wordstrom 2010 “The Festival Australiasian Writing” iha Darwin-Austrália.

Notisia relevante:Livru “TATOLI Nia Ain-Le’ut” Hakerek Ho Estilu Literatura

Jornalista : Felicidade Ximenes

Editór       : Rafy Belo  

HAKEREK NO HATÁN

Please enter your comment!
Please enter your name here