Reprezentante Eskritór Livru, Rafael Ximenes “Rafy” Belo. Imajen Tatoli/Egas Cristóvão.

DILI, 27 dezembru 2019 (TATOLI) – Livru “TATOLI Nia Ain-Le´ut” Hakerek Ho Estilu Literatura no uza tetun padraun ortografia, hodi haburas mós tetun nu’udar identidade nasionál ida. Livru ne´e hanesan mós matadalan ne’ebé sai “matan” no “dalan” ba públiku, estudante komunikasaun sosiál, jornalista, peskizadór no interesadu sira hodi deskobre mundu ajénsia notisioza nian liuliu Ajénsia TATOLI, IP.

Na´i no Lou sira tomak mak ha´u respeita no hadomi

Loron ida ohin, nu´udar loron importante, no momentu istóriku ida. Basá, durante ezisténsia Ajénsia informasaun ofisiál Estadu Timor-Leste, TATOLI,IP (Institutu Públiku) hahú husi embriaun, iha momentu difísil no krusiál sira hotu no hafoin transformasaun embriaun ba IP iha loron 31 jullu 2019, bainhira TATOLI iha nia lideransa ho figura lider sira ne´ebé dedikadu no serbisu makaas no mós komprometidu iha vizaun sira, ohin TATOLI hakerek tan istória ida iha nia pájina, iha nia jornada tomak, hodi lansa tan livru rua ho títulu “TATOLI NIA AIN-LE’UT no “LALATAK” nu´udar esforsu koletivu ida, iha liña orizontál no vertikál sira, durante ne’e.

Exelentísimu señór/a, Na´i no Lou sira

TATOLI Nia Ain-le’ut nu´udar livru ne´ebé mak haktuir ba ita kona-ba istória midar no moruk, sasidik, mehi no esperansa TATOLI nian iha ninia moris no lala’ok sira hahú husi embriaun ANTIL to´o transformasaun ba Instituisaun Publika (IP).

Livru “TATOLI Nia Ain-Le’ut” ne’e hakerek ho estilu literatura no uza tetun padraun ortografia, hodi haburas mós tetun nu’udar identidade nasionál ida. Livru ne´e hanesan mós matadalan ne’ebé sai “matan” no “dalan” ba públiku, estudante komunikasaun sosiál, jornalista, peskizadór no interesadu sira hodi deskobre mundu ajénsia notisioza nian liuliu Ajénsia TATOLI, IP.

Enkuantu, livru LALATAK nu’udar kompozisaun imajen sira kona-ba realidade sira ne’ebé akontese iha sosiedade timoroan sira nia leet iha parte oioin, ne’ebé halibur husi fotógrafu profisionál TATOLI nian prinsipalmente Fotógrafu António “Dasiparu” no kontribuidór seluk iha TATOLI ne’e [la haluha ba fotógrafu Jogerjo Guterres no Hortencio Sanches]. Livru LALATAK nu’udar faktu ne’ebé hatudu liuhusi imajen no mós liafuan sira, hodi sai nu´udar eransa; istória no memória.

Exelentísimu señór/a, Na´i no Lou sira

Livru rua, “TATOLI NIA AIN-LE’UT no “LALATAK”, maske ho limitasaun tempu no rekursu maibé dala ida tan hakerek na’in sira iha korajen foti responsabilidade tanba ho konsiderasaun katak faktu no dadus istóriku sira bainhira la hakerek, la prodús ba livru ruma, ema sei haluha iha tempu ruma no bele iha tentativa ba manipulasaun istória sira iha loron ruma be mai. Karik, ita-nia jerasaun sira tuirmai mós sei la hatene istória loloos kona-ba TATOLI.

Istória bainhira ema haluha no iha manipulasaun, istória ne´e rasik sei lakon nia valór iha ámbitu koñesimentu, sei la sai sasukat di’ak ba determina futuru. No, Istória ne´e mós sei la sai sentru inspirasaun ida iha ita-nia interasaun no jerasaun sira be tuirmai, husi tempu bá tempu.

Exelentísimu señór/a, Na´i no Lou sira

Nu’udar hakerek-na’in ka eskritór ba livru rua ne´e, apresia no agradese ua’in ba lideransa TATOLI, IP ho ekipa tomak iha TATOLI tanba ho sira-nia lideransa, ho sira-nia figura, kapasidade no abilidade tomak, hodi fó oportunidade ba ami (membru sira), hodi espresa posibilidade hotu, hodicesplora poténsia no kriatividade tomak husi membru ka subordinadu sira ida-idak sein limitasaun ba interese komún ida.

Liután ida ne´e, lider másimu TATOLI,IP hatudu mós interese makaas, dedikadu, apoia materiál no morál ho fleksibilidade tomak no promove komunikasaun direta no indiretamente ho intensivu hamutuk iha TATOLI hodi konkretiza vizaun no objetivu TATOLI, IP nian liuhusi asaun no komprometidu atu halo TATOLI transforma no evolui, ba TATOLI ida forte no sólidu tuir prinsípiu, norma no valór ajénsia informasaun nian, ho hana’i no haloko nafatin prinsípiu universál jornalizmu no kódigu deontolójiku sira.

Exelentísimu señór/a, Na´i no Lou sira

Hakerek-na´in sira sente no konxiente katak istória importante no presiza hakerek hodi rai husi jerasaun ba jerasaun. Tanba ne´e, bainhira lider TATOLI, IP lansa dezafiu ba hakerek-na’in sira, nu’udar hakerek-na’in la laran rua-rua atu simu dezafiu, oferese tempu no enerjia tomak hodi rekolla dadus no hakerek faktu istóriku sira maske ho tempu limitadu, fulan rua de´it. Nune’e mós, maske iha tempu hanesan dezempeña mós kna’ar seluk nu’udar jornalista maibé la suspira hodi kontinua organiza konteúdu sira iha livru rua ne´e.

Exelentísimu señór/a, Na´i no Lou sira

Ohin, ita halo Lansamentu ba livru “TATOLI NIA AIN-LE’UT no “LALATAK”. Maske nune´e, ita labele konsidera sai de’it nu´udar rezultadu atinjimentu ida ka nu’udar de’it serimónia hodi komemora atu demonstra de’it sentidu orgullu no satisfasaun ida maibé importante liu hotu husi lansamentu livru rua ne’e maka oinsá konteúdu tomak husi livru rua ne´e; liafuan no imajen sira, bele iha “podér” no iha liután “esénsia” atu influénsia ita liuliu iha kapasidade atu:

Halo ita sai prudente liután hodi la’o no hateke ba oin hasoru futuru;

Halo sosiedade demokrátiku la fasil influensiadu ba lia bosok sira hodi muda sira-nia persesaun kona-ba faktu loloos ida, iha loron ohin ka aban kona-ba TATOLI, nu´udar sentru informasaun kredivel no iha integridade hodi defende interese Estadu no públiku;

Halo ita iha hanoin plurikazuál ka konsiderasaun katak rezultadu husi buat ida ne’e mai husi PROSESU alias ita haree buat hotu ho multidimensaun la’ós razaun ida de’it ka monokazuál.

Nune’e mós, livru “TATOLI NIA AIN-LE’UT no “LALATAK” bele kontribui forma identidade no privasidade povu no mós nasaun nian iha aspetu, sosiál no kulturál.

Tanba ne´e, ba oin, aléinde hanesan hakerek-na’in nu’udar mós jornalista espera katak vizaun no objetivu TATOLI, IP nian bele atinje ba interese Estadu no públiku ho efisiénsia no efikásia, importante no nesesáriu promove nafatin atividade kriativa no inovativa sira liuhusi aproveita rekursu hotu ne´ebé TATOLI iha ho desizaun prudente lider sira-nian iha andamentu TATOLI nian, iha prezente no ba futuru. Hakerek livru “sientífiku” tenke sai kultura ida iha TATOLI no timoroan sira. Labele husik ema seluk de’it mak hakerek kona-ba ita-nia istória.

Atu taka, ha’u hakarak lori ita-boot sira hodi refleta hamutuk liafuan TATOLI liuhusi poezia simples ne’ebé ha’u hakerek;

TATOLI

Semo, semo ba leten aas bá
Kaer roman nabilan loron aban
La’o lemorai iha rai-rai, halo mehi nakfila sai realidade
Sai lia-na’in, dadolin no tatoli lia rai-na’in
Atu mundu labele dukur iha nia kadunan
Hateke nafatin illa ki’ik ne’e iha orizonte

Iha ramelau, kablaki no matebian tutun bá ó saudade rai-henek mutin
Iha bainloron naruk, ó halerik suviska
Hateke bá, anin foho hakmatek daudaun
Haree bá, laloran tasi mós nonok la hananu tan

Basá Loromatan hahú sa’e husi lorosa’e kari roman domin
Lori matak malirin, haburas neon
Basá loromatan fila hikas iha nakaras
Kuda esperansa, hametin fiar
Iha mundu TATOLI

Nu’udar mota, tatoli sei la sulin bainhira dalan laek
Nu’udar we, tatoli sei la kura rasik hamrook
Nu’udar ai-horis, tatoli sei la hamahon nia aan rasik
Nu’udar ai-funan, tatoli sei la horon nia morin rasik
Lia-loos sei la hananu, se tatoli la sai na’in ba lia-loos
Iha biban dadolin liberdade iha kbiit ukun nian

Rona mai….
Tatoli, fitun sabutar iha dadersan
Tatoli, knu’uk ba liafuan mahebun sira
Tatoli, we-debun moris foun ida
Hamoris ema foun ho hanoin foun, hakbiit liafoun
Husi Timór ida ba timoroan tomak
Iha illa ki’ik ne’e nia “hirus-matan” leten

Obrigadu no hakuak boot, dezeju Natál ksolok, pás, saúde no alegria ba ita hotu.

DÍLI,  27 Dezembru 2019

Rafael Ximenes “Rafy” Belo
Diskursu Reprezentante Eskritór Livru

HAKEREK NO HATÁN

Please enter your comment!
Please enter your name here