Diretór Ezekutivu Telkomcel, Yogi Rizkian Bahar (klaran), Vise-Prezidente, Heru Yulianto (liman-Loos), no Vise-Prezidente, Sudin (liman-karuk) hala'o hela konferénsia ba imprensa iha media center Telkomsel, Santos Living, Ai-mutin, segunda (23/12/2019). Imajen TATOLI/Antónia Gusmão.

DILI, 23 dezembru 2019 (TATOLI) – Diretór Ezekutivu Telkomsel, Yogi Rizkian Bahar, hatete kompetisaun iha área telekomunikasaun normál. Tanba ne’e, Telkomcel iha esperansa boot katak operadór telekomunikasaun Ceslink ne’ebé la kleur tan sei mosu (eziste), lori vantajen ba povu Timor-Leste (TL).

“Ba ami sente katak buat ida kompetisaun ne’e normál ona, más atu dehan ami ho Ceslink iha ona relasaun negósiu durante ne’e. Tanba ne’e maka ami respeita tebes Ceslink, ne’ebé ami espera katak Ceslink bainhira mosu tan iha Timor-Leste bele fó vantajen ba povu Timor”, Yogi Rizkian Bahar ateten iha Media Center Telkomcel, Santos Living, Ai-mutin, ohin.

Diretór Ezekutivu ne’e konsidera bainhira iha tan kompetisaun maka populasaun fasil atu hili produtu no rede ne’ebé di’ak. “No ami mós hanesan operadór tenke fó atendimentu ne’ebé di’ak liu tanba ami la fó atendimentu ne’ebé di’ak, ami maka sei hela, tanba ne’e agora daudaun tama ba loron boot ne’e ami hakarak oferese promosaun ne’ebé baratu no di’ak ba kliente sira, ami hakarak iha kriatividade ba produtu hodi atrai povu Timór hili Telkomcel sai nu’udar sira-nia operadór”.

Yogi mós konsidera ho mosu Ceslink hanesan dezafiu ida tantu ba Telkomcel no mós Ceslink rasik.

“Atu iha tan operadór ida tan iha Timór la fasil, tanba populasaun Timor-Leste tokon 1-resin, ne’ebé kompetisaun iha área telekomunikasaun ne’e la fasil tanba kompara ho Indonézia ne’ebé ho populasaun tokon 260 no operadór sia, maibé ikus mai hela de’it lima, ne’ebé la fasil tanba presiza kustu ne’ebé boot”, dehan.

Entretantu, Telkomcel investe ona millaun $100 iha Timor-Leste.

Responsavel Tékniku husi Empreza Ceslink, Moniz Maia, informa foin lalais ne’e katak preparasaun Ceslink atu sai operadór telekomunikasaun dahaat iha Timor-Leste atinje ona porsentu 95.

“Daudaun ne’e, ami-nia preparasaun ein termu fíziku no teknikamente atinje ona porsentu 95 no ami hein de’it desizaun ANC nian ba atribuisaun ba frekuénsia no númeru telefone bainhira sira atribui ona ida ne’e, Ceslink sei lansa parese iha tinan ne’e “, dehan nia ba Tatoli iha nia knaar fatin Bidau.

“Ami-nia preparasaun iha Dili laran de’it, tanba bazeia ba enkontru ho Konsellu Ministru foin daudaun ne’e, ami-nia prioridade maka oinsá konstrui uluk operadór ne’e iha Dili, tanba baze ba operadór Ceslink Dili sai prioridade”, dehan Moniz.

Bainhira ANC atribui ona frekuénsia no númeru no mós emite ona lisensa ofisiál katak Ceslink bele lansa ona, entaun iha ne’e maka Ceslink sei halo nian expansaun bá munisípiu.

Nia salienta iha área Dili de’it torre ba komunikasaun Ceslink nian kuaze 14 maka monta hotu ona no garante hafoin lansamentu bele kobre ba populasaun iha kapitál.

Moniz Maia afirma kona-ba dokumentu komprovativu nesesária sira ne’ebé maka sai hanesan rekizitu prinsipál hodi harii operadór ida, husi parte Ceslink rasik submete ona dezde iha 21 agostu ba ANC, no daudaun ne’e avalia no análize.

Ceslink mak operadór telekomunikasaun primeira husi emprezáriu timoroan ida ne’ebé investe hodi hakarak halo kompetisaun ho operadór tolu ne’ebé eziste uluk ona iha Timor-Leste hanesan Timor Telecom, Telemor no Telkomsel.

Entretantu, TATOLI atu konfirma fali sobre lansamentu ba operadór telekomunikasaun foun ne’e, más propetáriu Ceslink sei iha estranjeiru no ba parte Autoridade Nasionál Komunikasaun, maibé sei okupadu ho serbisu.

Notísia relevante : Telkomsel Haforsa Liután Rede iha Natál no Tinan Foun

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here