Diretór Ezekutivu Telkomcel, Yogi Rizkian Bahar (klaran), Vise-Prezidente, Heru Yulianto (liman-Loos), no Vise-Prezidente, Sudin (liman-karuk) hala'o hela konferénsia ba imprensa iha media center Telkomsel, Santos Living, Ai-mutin, segunda (23/12/2019). Imajen TATOLI/Antónia Gusmão.

DILI, 23 dezembru 2019 (TATOLI) – Diretór Ezekutivu Telkomcel, Yogi Rizkian Bahar, hateten tama ba tempu feriadu Natál no tinan foun 2020, Telkomcel kontinua mantein servisu telekomunikasaun nian ne’ebé konfiavel atu kliente bele haksolok ho laran hakmatek hodi bele kontinua komunika ba malu.

Telkomcel nu’udar operadór telekomunikasaun iha Timor-Leste iha knaar atu oferese servisu komunikasaun nian ne’ebé konfiavel no seguru hodi bele kontribui di’ak liután ba kliente nia nesesidade, no mós ba vida sosiál iha populasaun nia leet.

“Kapasidade rede 4G la’ós de’it iha kapitál no kapitál munisípiu, maibé mós ba iha suku sira iha territóriu Timór”, Diretór Ezekutivu Telkomcel informa liuhosi konferénsia ba imprensa iha Media Center Telkomcel, Santos Living, Ai-mutin, ohin.

Vise-Prezidente Network no IT, Sudin, realsa mós Telkomcel prontu atu oferese servisu di’ak liu ba ninia kliente.

“Tanba ne’e, Telkomcel atu fó atendimentu di’ak liután ba kliente sira maka ami serbisu makaas hodi oferese servisu ne’ebé diak, ne’ebé rede ami-nian dezde Natál 2018 no tinan foun 2019 ami oferese ona rede 4G iha Dili, no iha Natál 2019 no tinan foun 2020 ne’e maka ami estabelese tan rede Telkomcel nian iha munisípiu 13, depois ami estabelese tan área sira ne’ebé seidauk asesu rede Telkomcel ne’ebé ami harii torre 40 ho objetivu atu hasa’e kapasidade rede nune’e kliente Telkomcel nian ne’ebé maka ba to’o iha suku sira bele asesu rede”, Vise-Prezidente ne’e afirma.

Sudin hatutan hafoin harii torre sira ne’e maka rede ho kapasidade 4G ne’e estabelese mós iha suku no área sira ne’ebé rede Telkomcel nian iha, kompara ho antes ne’e rede 4G iha de’it Dili.

“Objetivu ami estabelese rede 4G to’o suku sira nune’e populasaun Timor-Leste ba pasa Natál no tinan foun iha sira-nia hela fatin ho rede ne’ebé di’ak liu, tanba ami uza teknolojia foun maka 4G ho kapasidade boot, ami espera katak povu Timor-Leste bele aproveita rede ne’ebé ami oferese”, katak.

Atu mantein rede ne’e ho di’ak maka, ekipa Telkomcel sempre akompaña liuhosi sistema monitoriza durante oras 24 no semana ida. Ne’ebé bainhira iha alarma mosu iha sistema ne’e maka ekipa sei fó atende kedas ba ekipa sira ne’ebé destakadu.

Tanba ne’e maka, Vise-Prezidente promete katak Telkomcel garante rede di’ak ho kapasidade boot ba ninia kliente sira liuliu iha loron boot.

Telkomcel Oferese Udan Bonus

Aléinde ne’e, Telkomcel mós oferese promosaun hanaran Udan Bonus hahú hosi 23 dezembru 2019 to’o 3 janeiru 2020.

Vise-Prezidente Marketing no Sales Telkomcel, Heru Yulianto, hateten bonus enxe pulsa hirak ne’ebé mak halo rekarga ou ene pulsa minimál $1 durante períodu promosaun Udan Bonus Natál nian, bele hetan bonus hosi rekarga to’o dala tolu.

“Bonus rekarga ne’e bele uza ba asesu internét o non pakote, bolu ou sms entre númeru Telkomcel no válidu ba loron hitu”, dehan.

Nia haktuir tan, iha promosaun Udan Bonus ne’e iha mós diskontu pakote roaming ba Indonézia ho valór $25 no $15.

“Telkomcel iha ona pakote roaing ba maluk sira ne’ebé hala’o viajen bá Indonézia no presiza pakote roaming. Espesiál ba períodu ida ne’e, Telkomcel oferese diskontu porsentu 50 ba pakote roaming Combo $25 nian, no 15 nian ou unlimited ba roaming call no sms”, nia esplika.

Heru subliña pakote roaming ne’e válidu ba roaming iha rede Telkomsel Indonézia nian, no xamada no sms unlimited durante roaming nian válidu bainhira halo xamada ba númeru Telkom no Telkomcel Indonézia no Telkomcel Timor-Leste.

Nune’e mós unlimited call ba Indonézia katak kliente sira bele halo xamada durante oras 24 (ko’alia sem limite) ba Indonézia ho pakote IDD Indonézia hosi Telkomsel. Ba períodu promosaun ne’e, aumenta duransaun unlimited call ba Indonézia sa’e ba oras 48.

Kliente bele ativa pakote ho sms hakerek REG INDO2 manda ba 123 no sei simu sms konfirmasaun hodi bele halo xamada unlimited oras 48 ba númeru Indonézia. Xamada ne’e válidu bainhira halo xamada ba númeru Telkom ou liña fixu noTelkomcel Indonézia hanesan simpati, kartu As, kartu HALO.

Telkomcel oferese mós diskontu bainhira halo xamada ba nasaun seluk sei aplika diskontu porsentu 50 ba tarifáriu hanesan Xina, Japan, South Korea, Portugál, UK no Austrália.

Kode xamada ba nasaun sira ne’e maka hanesan Xina ho kode +86, Japaun ho kode +81, South Korea +82, Portugl +51, Irlanda +353, UK ho kode +44 no Austrália +61.

Entretantu kliente Telkomcel nian iha Timor-Leste hamutuk 300.000.

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here