Primeiru Kongresu Nasionál Veteranu hala'o iha CCD, kinta (19/12/2019). Imajen/TATOLI Egas Cristovao

DILI, 19 dezembru 2019 (TATOLI)-“Nain ba Ukun-Aan no Riin ba Nasaun”, nu’udar tópiku sentrál ba primeiru kongresu nasionál veteranu kombatente libertasaun nasionál.

Notísia Relevante : Konferénsia Munisipál Manatuto Hili Ona Reprezentante Veteranu

Kongresu ne’ebé konsentra iha Centro Convenção Dili (CCD), hahú ohin to’o aban (19-20/12/2019) organiza husi Governu liuhusi Sekretária Estadu ba Asuntu Kombatente Libertasaun Nasionál (SEACLN-sigla portugés)

Sekretáriu Estadu SEACLN Gil da Costa ‘’Oan Soro” hateten, kongresu ne’e atu diskute no halibur ideia hodi estabelese Konsellu Nasionál Veteranu Kombatente Libertasaun Nasionál, inklui atu hili nia estrutura ba primeiru periodu nian.

Estabelesimentu konsellu bazeia ba Artigu 35 estatutu KNVKLN, ne’ebé prodús dekretu lei 7/2018 ne’ebé Presidente Repúblika promulga iha 2018.

Notísia Relevante : Sobrevivente Rezisténsia: Natureza Maka Sei Justifika Veteranu Loloos

Antes ne’e,  SEACLN organiza ona konferénsia KNVKLN iha munisípiu 12, inklui Rejiaun Administrativu Espesiál Oe-Cusse Ambeno (RAEOA). Gil “Oan Soro” salienta tan, Konsellu ba Veteranu ne’e hanesan órgaun konsulta ida husi veteranu nian hodi bele governu konsulta atividade ruma relasiona ho interese veteranu sira nian.

Reprezentante Komisaun Instaladora Rejiaun III, Vidal de Jesus “Riak Leman” iha esperansa boot katak, bainhira konsellu ne’e bele halibur veteranu hotu no identifika problema saida mak veteranu sira hasoru.

Kongresu ne’e partisipa husi kongresista veteranu no kombatente libertasaun nasionál hamutuk 900-resin husi territóriu.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here