Diretór Investigasaun Jeolojia Institutu Petróleu no Jeolojia, Elias da Silva Cabral. Imajen Tatoli/Florencio Miranda Ximenes

WATULARI, 20 dezembru 2019 (TATOLI) – Diretór Investigasaun Jeolójiku no Minerál, Elias da Silva Cabral, hateten Institutu Petróleu no Jeolojia (IPG, sigla portugés) presiza laboratóriu no edifísiu permanente hodi halo análize ba amostra hosi mina no gás sira ne’ebé durante ne’e sira halo ona estudu.

Tanba tuir Elias katak amostra ne’ebé tékniku IPG nian durante ne’e foti barak maka seidauk iha rezultadu tanba análize iha rai-li’ur, ne’ebé atu lori sai hosi Timor-Leste bá fali nasaun seluk lori prosesu tanba preokupa mós ba risku.

“Durante ami foti sampel hosi mina no gás hamutuk iha 17, iha lima mak iha ona rezultadu análiza laboratóriu, restu seidauk tanba gás ne’e bainhira atu lori sai bá li’ur mós risku bainhira tula iha aviaun tanba bele nakfera iha aviaun laran. Ami IPG persija laboratóriu”, Diretór Elias ba jornalista sira iha Iralere, suku Matahoi, Postu Administrativu Watulari, Munisípiu Viqueque, ohin.

Diretór Investigasaun Jeolójiku ne’e afirma, dezde kriasaun IPG sempre preokupa laboratóriu, maibé to’o agora mós IPG seidauk iha edifísiu permanente hodi instala laboratóriu.

“Tanba atu harii laboratóriu ida presiza edifísiu permanente nune’e instala laboratóriu, se lae maka instala tiha depois harii fali edifísiu tuirmai ne’e bele afeta ba kustu tanba muda fatin bá-mai. Governu deside ona fatin atu halo edifísiu, maibé sei iha prosesu”.

Elias dehan amostra ne’ebé sira foti durante ne’e lori bá análize laboratóriu iha Indonézia.

IPG estabelese iha 2012, maibé hala’o servisu loloos iha 2013. Daudaun ne’e, seidauk iha edifísiu permanente.

“Presiza Laboratóriu Teste Fatuk Minerál”

Jornalista : Antónia Gusmão
Editora : Maria Auxiliadora

HAKEREK NO HATÁN

Please enter your comment!
Please enter your name here