Diretór Divizaun Investigasaun Jeolojia IPG, Elias da Silva Cabral. Imajen/Florencio..

DILI, 16 agostu 2019 (TATOLI)–Diretór Divizaun Investigasaun Jeolojia, Institutu Petróleu no Jeolojia (IPG), Elias da Silva Cabral, salienta durante ne’e IPG seidauk iha laboratóriu atu halo teste ba fatuk minerál.

“Ami sempre iha dilema tanba seidauk iha fatin laboratóriu hodi fasilita atu halo teste ba amostra minerál ne’ebé deteta”, Elias Silva ba Ajénsia Tatoli iha nia kna’ar fatin, Delta III, ohin.

Nia haktuir durante ne’e laboratóriu iha IPG laiha, maibé joint ho laboratóriu Universidade Nasionál Timor-Leste (UNTL) iha Hera, maski limitadu maibé aproveita hodi análize amostra ne’ebé iha.

“Laboratóriu UNTL iha Hera mós limitadu tebes tanba bele halo análize de’it petografia, palentolojia, minerál grafik”, dehan.

Aléinde ne’e mós IPG komunika nafatin laboratóriu sira iha estranjeiru atu análize amostra ne’ebé haruka ba, maski hein to’o fulan ida ka tolu maka iha rezultadu, hanesan minerál ka tipu saida.

Hodi hatutan tan amostra minerál hirak ne’e haruka ba análize iha laboratóriu Kanadá, Badan Geologi Indonesia inklui Austrália Birar Laboratorium.

“Ita haruka sampel ba análize iha ema nia laboratóriu no shipping cost ita selu no  haruka fila mós ita  selu fali, ne’ebé ita lakon osan lubuk ida”, katak.

Kona-ba kustu orsamentu, nia dehan, depende ba métodu sampél hira mak haruka ba análize iha ema nia laboratórium.

“Kuaze kustu la hanesan pin injection test per sampel, selu to’o $50 ne’e mak foin análize, ne’ebé seidauk konta shipping cost, iha tinan 2014 ami análize sampel 40 ba stream sediment ita selu $9.000-resin ba análize ida”, esplika.

“Imajina ita halo estudu barak, osan sira ne’e ita rai hamutuk dalaruma ita mós bele hola ekipamentu ida,  nusá ita lahalo ita nian, dúke ita selu fali ba ema”, nia halerik.

Kona-ba preparasaun atu harii laboratóriu, nia hatete dezde IPG ne’e hahú ko’alia ona ho Ministériu Petróleu no Rekusu Minerál, maibé fatin ka rai mak seidauk iha.

Maibé rekursu umanu iha IPG iha kapasidade atu halo análize ba minerál manganés hodi uza mákina sira ne’ebé sei instala iha laboratóriu.

Enkuantu, daudaun ne’e iha ona faze buka propriedade, servisu hamutuk ho Ministériu Justisa liuhosi Sekretário Terras no Proriedade no Ministériu Obra Públika (MOP).

“Ha’u espera katak iha 2019, fatin ka rai iha ona atu iha tinan oin komesa planu ona atu halo instalasaun”, adianta.

Jornalista : Florencio Miranda Ximenes

Editora  : Maria Auxiliadora

HAKEREK NO HATÁN

Please enter your comment!
Please enter your name here