Diretora FOKUPERS, Maria José Guterres. Imajen/ TATOLI

DILI, 20 dezembru 2019 (TATOLI)-Organizasaun Forum Komunikasaun ba Feto Timor-Leste (FOKUPERS) to’o ohin, ezekuta ona orsamentu  jerál estadu 2019, porsentu 90 hosi fundu tranférensia  públika hamutuk  rihun $ 98-resin ne’ebé hetan apoiu hosi Ministériu Solidaridade Sosiál no Inkluzaun (MSSI).

Diretóra FOKUPERS, Maria José Guterres, relata hosi totál apoiu ne’e aloka  ba iha uma mahon Maria Tapo Munisipiu Bobonaro hamutuk  rihun $63,002.111 no uma mahon Dili $35,407.41.

Nia parte  ezekuta  orsamentu ne’e ba servisu administrasaun hosi uma mahon nian nomós hodi  fó asisténsia ba vítima violasaun  hasoru feto no labarik.

“Dadaun  ne’e, ezekuta ona porsentu 90,hela porsentu 10 hodi atende nesesidade iha fulan-dezembru nia laran,”tenik Diretóra FOKUPERS ne’e ba TATOLI, iha ninia servisu fatin Faról Dili,ohin.

Notísia Relevante:MSSI Apoia $1,388.711.00 Ba Instituisaun Solidariedade Sosiál  35

Tuir relatóriu FOKUPERS hosi janeiru to’o dezembru 2019, organizasaun ne’ebé tau-matan ba feto ho labarik feto ne’e,  fó ona asisténsia ba kazu violasaun hasoru feto hamutuk ema na’in 243-resin ne’ebé rejista hosi uma mahon Dili, Bobonaro no uma tranzitóriu iha Munisípiu Covalima.

Kazu hirak ne’e, maiória  maka kazu violénsia doméstika, abandonadu, violasaun seksuál,  abuzu seksuál no seluk tan.

“Ita fó atendimentu integradu ba sira, balun hela iha uma mahon to’o fulan ne’en ka tinan ida hafoin rekopera ita re-integra ba família,”Nia realsa tan.

Maria José Guterres, esplika vítima  hosi kazu hirak ne’e maiória re-integra ona ba família tanba sira-nia kazu resolvidu no falta de’it kazu 10 maka sei iha prosesu atu resolve.

Jornalista:Nelson de Sousa

Editór: Francisco Simões

HAKEREK NO HATÁN

Please enter your comment!
Please enter your name here