Prezidente APORTIL, Flavio Cardoso Neves. Imajen/Antonio Goncalves

DILI,  19  novembru 2019 (TATOLI) – Prezidente Konsellu Administrasaun Autoridade Portuáriu Timor-Leste (APORTIL), Flávio Cardoso Neves, hateten manutensaun ró Nakroma iha Surabaya-Indonézia ne’ebé halo husi kompañia Ben Santoso atinje ona porsentu 85.

“Ne’ebé ha’u espera  katak  iha loron 10 to’o 15 dezembru  tenke mai ona  iha Timor-Leste atu fasilita ita-nian komunidade Oe-Cusse no Ataúro halo viajen durante loron boot Natál ho tinan foun ninian”, Prezidente APORTIL Flávio Neves ba Tatoli, iha kna’ar fatin Portu Dili, ohin.

Flávio Cardoso Neves dehan kompañia Ben Santoso halo manutensaun ne’e ekipa téknika na’in-lima husi APORTIL halo monitorizasaun atu hatene nia sasán saida mak troka no monta foun ne’e saida.

“Manutensaun kuaze 85% ona, maibé importante ba ha’u ró ne’e ita hakarak fila mai ho kondisaun di’ak tanba ita tula ita-nia pasajeiru no nia vida ne’e importante”, katak.

Diresaun Nasionál Transporte Marítima hamutuk ho Biro Klasifikasaun Indonézia halo inspesaun ba iha ró Nakroma katak téknikamente ba manutensaun ró ne’e mákina sira, eletrisidade, sistema navegasaun no materiál salva vida, pinta fali no hasai ferrujen sira iha ró nia okos.

“Ha’u haruka ona ekipa finansa husi APORTIL nian bá fali ona Surabaya atu haree fali , enkuantu iha orsamentu adisionál ita bele aumenta tan, maibé to’o agora seidauk iha orsamentu aumentu”, katak

APORTIL kontratu ho kompañia Ben Santoso husi Indonézia ne’ebé ró Nakroma arranka bá halo manutensaun iha Surabaya-Indonézia iha 30 setembru ho totál orsamentu $226.000.

Notísia relevante : Ohin, Ró Nakroma bá Halo Manutensaun iha Surabaya

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here