Prezidente Veteranu Soibada, Agripino Sarmento 'Coisiri‘. Imajen/Joanico de Araújo

MANATUTO, 03 dezembru 2019 (TATOLI) – Prezidente Veteranu Soibada, Agripino Sarmento ‘Coisiri’, hateten liuhosi Konferénsia Munisipál Manatuto, ne’ebé realiza foin lais, konsege hili ona ninia reprezentante.

Razaun Komisaun Instaladora realiza konferénsia munisipál iha munisípiu 12, inklui Rejiaun Administrativa Espesiál Oé-cusse Ambeno (RAEOA), hodi hili reprezentante husi munisípiu, nune’e entre reprezentante sira sei hili atu aban bain rua sei tuur iha estrutura nasionál, liuhosi Kongresu Nasionál ne’ebé sei realiza iha loron veteranu 1 to’o 3 marsu 2020.

“Iha Konferénsia Munisipál, ami deside hili reprezentante na’in-5, ne’ebé kompostu hosi munisípiu na’in-2 no na’in-3 ne’ebé kompostu hosi koordenadór ida no suplente rua atu haruka ba nasionál”, Coisiri informa.

Nia realsa, reprezentate munisípiu na’in-5, sei simu pose iha marsu 2020, atu sai Konsellu Veteranu hodi reprezenta Munisípiu Manatuto.

Tuir Coisiri, kritériu ba reprezentante veteranu bainhira atu sai Konsellu Veteranu Munisipál maka labele kaer kargu ruma iha instituisaun Estadu no tenke livre.

“Ninia kritériu maka sira nain-5 ne’ebé atu sai Konsellu Veteranu Munisípiu nian, labele sai funsionáriu, labele kaer kargu xefe suku ka serbisu seluk ruma. Nia tenke livre,  nune’e bele kaer de’it kargu Konsellu Veteranu ba munisípiu, ida ne’e mak ami halo selesaun ba sira”, nia akresenta.

Nia subliña, serbisu dahuluk ne’ebé veteranu na’in-5 ne’e sei halo hafoin simu pose maka sei re-valida fila-fali dadus veteranu ne’ebé uluk la liu.

“Bainhira hetan pose iha fulan marsu 2020, sira na’in-5 nia serbisu ida maka tenke re-valida fila-fali maluk sira ne’ebé uluk hetan XV 19 VIII 14 no maluk sira ne’ebé la pasa validasaun, ne’ebé bainhira haree ba nia la hetan osan maibé tuir dadus loloos ne’e nia bele hetan”, nia salienta.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here