Fundadór Organizasaun Konservasaun Flora no Fauna, Alito Rosa. Imajen/TATOLI.

DILI, 19 dezembru 2019 (TATOLI) – Fundadór Konservasaun Flora no Fauna (KFF), Alito Rosa, husu ba entidade hotu atu tau atensaun ba balada sira iha Jaco, tanba setór turizmu bainhira la’o di’ak, turista sira bele vizita hodi haree mós animál fuik sira hanesan manu-fuik, rusa, ahu-ruin, rai-henek mutin no seluk tan.

“Bainhira ita tau atensaun ba Illa Jaco, entaun setór turizmu mós sei la’o di’ak, turista sira atu bá ne’ebá, la’ós haree de’it illa, maibé haree mós animál fuik sira hanesan rusa, manu-fuik, ahu-ruin, rai-henek mutin, signifika iha buat ruma ne’ebé atrai sira, entaun ida ne’e maka ita presiza proteje atu fó benefísiu ba ema hotu”, Alito Rosa ba Ajénsia TATOLI iha Peace Coffe, Colmera, ohin.

Atu fó benefísiu ba ema, nia salienta loron ida peskadór sira tula turista sira bá Jaco, bá hariis tasi moos, maibé bainhira ema estraga tasi no ambiente iha ne’ebá, entaun estraga futuru rasik.

Nune’e, nia rekomenda ba ministériu relevante atu halo jestaun di’ak ba parke nasionál tanba iha valór boot ba futuru, tanba sei konsidera parke hanesan rikusoin mundiál liuhosi rejistu UNESCO, nune’e ema hotu presiza proteje.

Hodi hatutan Timor-Leste iha illa rua ne’ebé iha valór boot ba setór turizmu, Ataúro ho Jaco, tanba ne’e presiza proteje didi’ak atu labele hetan ameasa hosi ita ema, bainhira iha ameasa maka valór turizmu sei tun no rendimentu ema nian mós sei menus.

Nia kestiona katak Jaco to’o agora laiha jestaun ne’ebé di’ak maski poténsia boot ba turizmu nian tanba kada loron ema sempre bá vizita hodi haree Jaco nia beleza.

Tuir nia katak Jaco iha ekosistema tomak, iha balada sira barak, aléinde rusa iha mós manu-fuik no animál sira seluk ne’ebé iha ne’ebá, maibé problema ne’ebé akontese daudaun ema haree liu ba rusa tanba barak maka mate.

Maski Estadu kada tinan aloka orsamentu ba Jaco hodi lori bee bá rusa sira, maibé laiha sustentabilidade, signifika Estadu tenke investe hela de’it osan ba ne’ebá, atu evita ida ne’e maka tenke kria polítika ida atu estabelese bee permanente atubele fornese ba balada sira.

Maibé mós parte turizmu tenke estabelese regra ida atu turista sira bá Jaco iha obrigasaun morál atu lori bee bá ne’ebá, hodi bele fó hemu ba balada sira, nune’e mós Governu tenke instala bee iha Jaco.

“Bele instala bee iha Jaco tanba iha ne’ebá iha tasi-been de’it, ezemplu iha nasaun barak ema uza tasi-been atu sai bee hodi fó hemu ba animál no ema”, katak.

Notísia relevante : 2020, MAP Estabelese Fonte Bee Permanente iha Jaco

Jornalista : Zezito Silva

Editora : Maria Auxiliadora

HAKEREK NO HATÁN

Please enter your comment!
Please enter your name here