Ministru Agrikultura no Peska (MAP), Joaquim José Gusmao dos Reis Martins. Imajen/ Jogerjo Guterres.

DILI, 16 dezembru 2019 (TATOLI) – Tuir planu Ministériu Agrikultura no Peska (MAP) sei tau painél solár iha Jaco hodi aproveita maho-been hodi prodús bee permanente iha Jaco, nune’e rusa bele aproveita iha bailoro naruk.

“Ami haree ona katak 2020 bele estabelese ekipamentu sira hanesan ne’e iha Jaco atu rusa sira bele hetan bee ne’ebé maka permanente iha ne’ebá”, Ministru Agrikultura no Peska, Joaquim José Gusmão dos Reis Martins, ba Ajénsia TATOLI iha nia knaar fatin, Comoro, ohin.

Molok atu estabelese painél solár MAP sei halo peskiza atu nune’e, tinan oin bele monta ona ekipamentu hodi bele rezolve problema bee iha Jaco.

Nia fó ezemplu; hanesan iha Ataúro, liuhosi Konservasaun Internasionál konsege estabelese painél solár hodi oferese bee ba komunidade sira.

Nune’e, teknolojia ne’e bele ajuda hodi prodús bee iha Jaco, atu rusa bele aproveita hodi isin-di’ak no saudavel nafatin iha futuru, enkuantu painél solár bele prodús bee ho loron ida bele to’o litru 50, tanba ne’e sei monta 10 iha Jaco atubele rezolve problema bee iha ne’ebá.

Tanba ne’e, ministru husu ba Parlamentu Nasionál atu aprova orsamentu 2020 nian, hodi rezolve situasaun ne’e iha Jaco, tanba tinan-tinan bee sempre laiha kauza hosi bailoro naruk, ai-han menus hodi rezulta rusa barak maka mate.

“Situasaun hirak ne’e akontese tanba kauza hosi mudansa klimátika halo rai-manas, bee laiha no ai-han laiha, entaun halo animál sira la tahan”, dehan.

Notísia relevante : Aban, MAP Intensifika Bee ba Rusa Sira iha Jaco

Entretantu, ministru agradese eis Prezidente Repúblika Kay Rala Xanana Gusmão tanba aman ne’ebé iha nosaun ida di’ak tebes ba nia povu no animál sira. Tanba ne’e, esensiál ba rusa maka lori bee ba sira.

Notísia relevante : Hadomi Balada Sira : Xanana Lori Bee Litru 320 Ba Rusa iha Illa Jaco

Jornalista : Zezito Silva

Editora : Maria Auxiliadora

HAKEREK NO HATÁN

Please enter your comment!
Please enter your name here