Xefe Suku Laisorulai de Baixo, José Pinto. Imajen/Antónia Gusmão.

QUELICAI, 19 dezembru 2019 (TATOLI) – Komunidade suku Laisorulai de Baixo, Postu Administrativu Quelicai, Munisípiu Baucau, kongratula ekipa Institutu Petróleu no Jeolojia (IPG, sigla portugés) tanba bele hili suku refere hodi instala module Amplified Geochemical Imaging (AGI) hodi identifika rikusoin.

“Ha’u lori komunidade nia naran kongratula no orgullu tebes ba ekipa IPG, ita iha rekursu ne’ebé natoon, maibé ita iha potensialidade hodi deteta ita-nia rikusoin ne’ebé maka iha kada suku iha territóriu laran tomak. Hanesan xefe suku agradese tebes, no prontu atu koopera ho ekipa”, Xefe Suku Laisorulai de Baixo, José Pinto, hateten ba jornalista sira hafoin enkontru ho ekipa IPG iha sede ne’e, Postu Administrativu Quelicai, Munisípiu Baucau, ohin.

Kona-ba atu koopera di’ak liután ho ekipa bainhira hasoru difikuldade hanesan iha área ne’ebé lulik, autoridade lokál ne’e, dehan rai lulik na’in mak ema tanba ne’e sempre iha dalan atu rezolve.

“Kona-ba lulik ba buat ne’ebé di’ak, ba ita-nia nasaun Timor-Leste ita bele ko’alia, prontu para atu halo tuir lulik sira ne’e hodi hatudu rikusoin sira ne’ebé iha, nune’e bele dezenvolve suku, postu no munisípiu”, afirma.

Autoridade lokál ne’e iha esperansa boot ba ekipa téknika IPG katak, maski ho rekursu umanu ne’ebé natoon, maibé sei identifika hotu rikusoin Timór nian para dezenvolve nasaun sai buras no di’ak iha futuru.

Iha fatin seluk, Xefe Aldeia, Martinho Valente, sente kontente tebes tanba rikusoin ne’ebé iha labele haree ho matan, maibé ho prezensa ekipa téknika IPG nian bele deskobre rikusoin sira ne’ebé durante ne’e subar aan hela.

“Dehan ita-nia rain ne’e iha rikusoin más seidauk deskobre, maibé kuandu tékniku sira mai deskobre ona, ami sente kontente tebes, tan ne’e ami apoia tomak, ne’ebé área ne’ebé dehan lulik ami rai-na’in maka hatene”,  Martinho Valente dehan.

Postu Administrativu Quelicai iha suku 15. Iha suku Laisorulai iha aldeia haat, Dara-Oma, Lego, Saua-Cassa, Ulu-Soro ho total abitante 1.483.

Notísia relevante : IPG Hasoru Difikuldade Bainhira Instala Module iha Rai “Lulik”

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here