Ekipa Institutu Petróleu no Jeolojia hasai foto hamutuk antes tun bá terrenu instala module hodi identifika mina no gás iha Postu Administrativu Quelicai, Munisípiu Baucau, Kinta, 19 dezembru 2019. Imajen/Antónia Gusmão.

QUELICAI, 19 dezembru 2019 (TATOLI) – Institutu Petróleu no Jeolojia (IPG, sigla portugés) hasoru difikuldade bainhira instala module Amplified Geochemical Imaging (AGI) hodi identifika mina no gás iha rai sira ne’ebé konsidera “lulik”.

Xefe Unidade Petróleu no Gás, Joanico Pires, hateten difikuldade ne’ebé sira hasoru maka bainhira atu halo estudu hodi instala module ba iha rai-lulik sira, maibé ekipa sempre halo koordenasaun ho autoridade lokál no komunidade hodi informa uluk.

“Ami hasoru difikuldade duni bainhira ami atu instala module iha Bloku B, tanba iha área balu lulik, maibé antes atu tun bá, ami sempre hasoru uluk autoridade no komunidade sira hela iha área refere hodi hatudu katak fatin ne’e lulik ka lae?”, Joanico Pires informa iha Postu Administrativu Quelicai, Munisípiu Baucau, ohin.

Nia dehan durante loron hirak nia laran iha suku Babul, Postu Administrativu Watulari, Munisípiu Viqueque, maka hasoru duni dezafiu. “Mas ami-nia ekipa konsege tama tiha no ikus mai ekipa bá fali husu matak-malirin hosi lia-na’in sira, nune’e halo fali estudu labele mosu problema”, Joanico katak.

Xefe Unidade Petróleu no Gás ne’e subliña iha área balu hanesan Venilale no Quelicai seidauk hetan fatin ne’ebé lulik, tanba ne’e iha esperansa atu labele hasoru difikuldade hanesan, maibé kuandu área sira ne’ebé lulik ekipa deside la instala no identifika fali fatin seluk.

Obstákulu seluk ne’ebé ekipa hasoru mós maka hanesan komunidade balu la autoriza atu halo instalasaun ba sira-nia fatin.

“Difikuldade ida maka bainhira ami tama atu halo instalasaun, ita-nia komunidade balu la hatán, maibé ne’e normál, tanba sira seidauk komprende, maibé depende ba maneira ko’alia xefe ekipa hodi hato’o ba komunidade maibé realidade katak sira simu ekipa IPG iha sira-nia fatin”, afirma.

Entretantu, daudaun ne’e ekipa IPG kontinua instala AGI ou ekipamentu ida ne’ebé ligadu ho kímika iha postu administrativu Quelicai no Baucau.

Ekipamentu AGI nu’udar teknolojia moderna ne’ebé utiliza ba esplorasaun jeokímika hodi identifika mina, gás liuhusi migrasaun microseepage, indika ho kímika analítika husi C2 to’o C20 iha fatuk jeradór ou fatuk rezervatóriu.

Bloku B ne’e kompostu husi Postu Administrativu Watulari-Viqueque, Munisípiu Baucau mak Quelicai no Postu Baukau.

Notísia relevante : IPG Instala Module hodi Identifika Mina no Gás iha Quelicai

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here