Estrada Laisorulai. Imajen/Antónia Gusmão.

QUELICAI, 19 dezembru 2019 (TATOLI) – “Ami-nia estrada aat tebes, piór liu tempu udan, dala ruma motorizada mós ema hulan de’it”, Xefe suku Laisorulai, José Pinto, dehan ba jornalista sira iha Laisorulai, ohin.

Autoridade lokál ne’e salienta maioria populasaun iha suku Laisorulai, Postu Administrativu Quelicai, Munisípiu Baucau, mós difisil tebes atu lori produtu lokál ba fa’an iha Merkadu. Tanba kondisaun estada difikulta movimentu transporte públiku, satán iha tempu udan monu-rai.

Xefe Suku Laisorulai, Postu Administrativu Quelicai, Munisípiu Baucau, José Pinto. Imajen TATOLI/Antónia Gusmão.

“Baibain saburaka ne’ebé maka fa’an iha Dili ne’e mai hosi Lekidoe, maibé ami iha Laisorulai mós saburaka barak, maibé ami labele lori to’o merkadu, tanba ami-nia estrada maka kondisaun ladi’ak. Ami iha transporte públiku, maibé dala ruma la halo movimentu tanba kondisaun estrada la permite”, preokupasaun ne’e hato’o hosi Xefe suku Laisorulai ne’e.

Nia dehan difikuldade iha infraestrutura bázika fó presaun boot ba komunidade tanba fa’an produtu lokál sira ne’e maka atu eleva ekonomia hodi sustenta família tanba ne’e estrada sai prioridade ba Laisorulai.

Relasiona ba kestaun refere, autoridade lokál ne’e dehan, bainhira reuniaun iha nivel munisipál sempre levanta, maibé solusaun seidauk iha.

Nune’e, nia dehan estrada liga Quelicai vila mai to’o suku Laisorulai konsidera hanesan estrada rejionál, tanba bele fó asesu mós ba Postu Administrativu Watulari, Watukarabau, Munisípiu Viqueque, no Postu Administrativu Baguia, Venilale, Munisípiu Baucau.

Hodi dehan bainhira kondisaun estrada ladi’ak maka tarefa ne’ebé transporte públiku aplika ba pasajeiru mós boot ou karun, kuandu nune’e maka produtu ne’ebé komunidade lori ba fa’an sei labele hetan rendimentu.

Xefe Aldeia Dara-Oma, António Afonso dos Santos, mós lamenta ho kondisaun estrada tanba fó impaktu tebes ba komunidade hodi halo movimentu ba mai.

“Ami-nia estrada presiza hadi’a, nune’e ami bele lori ami-nia sasán ba fa’an hodi hetan netik osan hodi sustenta ami-nia família, ami husu ba Governu se bele tun direta mai haree ami-nia kondisaun estrada”, António husu.

Produtu lokál ne’ebé iha suku Laisorulai maka hanesan saburaka, jambua, has, fehuk, talas, ai-farina no modo-tahan.

Notísia relevante : Komunidade Laisorulai Kongratula Ekipa IPG

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here