Diretór Ceftec, Luis Evaristo dos Santos Soares. Imajen Egas Cristovão

DILI, 17 dezembru 2019 (TATOLI)-Reprezentante Sekretáriu Estadu Komunikasaun Sosiál (SEKOMS), Diretór Nasionál CEFTEC (Sentru Formasaun Téknika iha Komunikasaun, sigla portugés), Luís Evaristo dos Santos hateten, bainhira media konvensionál sira la prepara aan sei lakon ho media online.

Media online, husi joven to´o katuas no ferik agora familiár ho telemovel no hakarak informasaun saida de´it hetan iha ne´ebá. Se uza mobile ho ferramenta Android bele asesu kualker informasaun, entaun nu´udar informadór partilla informasaun ne´ebé mak informativu no edukativu. Responsabilidade ita idaidak nian.

Notísia relevante:Papel Media Iha Kualker Asuntu

“Responsabilidade boot liu oinsá ita-nia kontribuisaun ba iha informasaun ne’ebé mak edukativu. Se ita lee iha media sosiál facebook ka iha online oioin mosu informasaun ne’ebé mak falsu bainhira ita partilla tutan tan informasaun ne’e entaun ita mós kontribui ba informsaun falsa iha sosiedade nia leet,” dehan Diretór Nasionál Luís Evaristo Soares, bainhira ko´alia kona-ba Papel Meiu Komunikasaun Sosiál atu Harii Sosiedade ne´ebé Informativu, perante graduadu CANXIGO, iha Sentru Formasaun CANXIGO, Balide, Dili, ohin.

“Entaun ida ne’e mak ita hothotu simu no komunga hahalok ida ne’e no evita atu partilla informasaun sira ba komunidade liuhusi informasaun no publikasaun sira ne’ebé mak laloos iha media sosiál,” reforsa tan ezekutivu ne´e.

Diretór Nasionál CEFTEC, Luís Evaristo dos Santos fó hanoin, bainhira ita hakarak partilla informasaun balun, ita tenke tau informasaun ne´ebé mak loos no loloos duni no iha faktus no tenke responsabiliza informasaun ne’ebé mak ita publika sai. Banhira ita publika sai klaru katak ema hothotu sei konsume ita-nia informasaun.

“Hanesan formandu, hanesan matenek iha área komunikasaun ne’ebé mak atu utiliza meius sira ne’ebé mak ita iha tenke tau atensaun másima ba hahalok sira ne’e. Ida ne’e mak ita liga ho formasaun katak ita tenke kria kondisaun ho hanorin formandu sira ho didi´ak iha área ne’ebé mak tuir formasaun ba”.

Nune´e, Reprezentante SEKOMS, Luís Evaristo dos Santos akresenta, tenke iha duni formadór ne’ebé adekuadu, formadór sira ne’ebé mak kualidade atu garante katak formandu sira banhira ramata formasaun sira iha dalan ne’ebé mak loos.

“Ida ne’e mak CEFTEC nia misaun tanba ne’e mak ha’u loke dalan ba dirijente sira hotu hanesan instituisaun estadu nian ne’ebé mak reprezenta SEKOMS nian atu dehan ba ita hotu iha ne’e katak Sekretariu Estadu Komunikasaun Sosiál mak responsabiliza iha SEKOMS tau aas interese povu nian liuliu atu atribui ka disemina informasaun ne’ebé mak loos tanba ne’e mak planu barak iha Sekretariu Estadu Komunikasaun Sosiál lori informasaun hodi hakbesik ba komunidade,” informa Diretór CEfTEC ne´e.

Notísia relevante:Media Estadu Ajuda Konsolida Estadu No Promove Pás

Jornalista        : Felicidade Ximenes

Editór              : Rafy Belo

HAKEREK NO HATÁN

Please enter your comment!
Please enter your name here