Prezidente TATOLI. I.P, José da Costa. Imajen Tatoli/Egas Cristóvão.

DILI, 11 dezembru 2019 (TATOLI)-Prezidente Konsellu Diretivu, TATOLI,IP (Institutu Públiku), José da Costa hateten katak, media estadu iha papel importante atu  ajuda konsolida estadu no ajuda para promove pás no estabilidade. Media estadu hanesan mós media profisionál sira. Katak, iha jornalista profisionál halo mós notísia iha aspetu sira seluk ba interrese públiku no estadu.

“Buat ne’ebé distingi nia (media estadu) no buat sira seluk, iha informasaun sira ne’ebé nia fó sai, informasaun sira ne’ebé ajuda atu konsolida, ajuda atu halo malirin, ajuda atu hanorin, ajuda atu eduka, informasaun sira ne’ebé di’ak liu ba nia povu,” hateten Prezidente TATOLI,IP, José da Costa bainhira sai oradór, iha ámbitu semináriu nasionál “Halibur Opiniaun Públiku Relasiona ho Papél Media iha Dezenvolvimentu Nasiónal Timor-Leste” iha salaun Universidade Oriental Timor Lorosa´e (UNITAL), Becora, Dili, ohin.

Iha mundu, tuir Prezidente Konsellu Diretivu TATOLI, IP, teoria hotu ne’ebé akontese define ema ko’alia kona-ba poder. Poder ne´e iha barak maibé entre poder sira ne´e iha poder haat mak esensiál liu hanesan poder ekonómiku; ema sira ne’ebé iha osan, iha ekonomia di’ak, nia bele influénsia nasaun, nia bele influénsia situasaun.

Tuir mai, poder polítiku katak kuandu ema politíku sira iha poder atu hola desizaun, nia iha poder atu influénsia situasaun ida.

Seluk mak Poder populár; ita sira hotu ne’e poder iha ita-nia liman,  ita bele deside. Seluk tan mak poder informasaun (power of information) katak informasaun ne’e iha poder, katak informasaun ne’ebé media sira fó sai iha poder atu ajuda, atu estraga, atu mós ajuda hateten.

Autoridade másima Ajénsia TATOLI-Ajénsia informasaun ofisiál estadu Timor-Leste, José da Costa akresenta katak maske ita iha seguransa metin iha ita-nia fronteira sira maibé se ita la tau-matan ka investe iha media atu ajuda informasaun ne’ebé loloos no kredivel, ita sei iha problema nafatin tanba informasaun husi rai seluk tama husi ita-nia dapur (koziña) kotuk, tama iha ita-nia oan sira-nia kakutak laran, tama husi televizaun, tama husi facebook ne’ebé ita asesu.

“Ne’e katak importante tebes atu estadu hanoin tenke investe para hamosu media sira ho informasaun ne’ebé ho kualidade no kredivel ba ita-nia sidadaun. Tanba ne’e, importante tebes atu media estadu sira asume responsabilidade atu tulun hodi konsolida informasaun sira ne’ebé apropriadu liu bá ita-nia rai,” katak Prezidente José da Costa.

Prezidente TATOLI, IP, José da Costa akresenta liután katak Timor-Leste iha hela faze konstrusaun estadu. Katak, harii daudauk ita-nia rai. “Ita-boot sira (estudante) imajina, konstrusaun estadu hanesan ita konstrui uma ida, tau fondasi, hada bloku, hada depois hasa’e fali. Entaun situasaun ita-nia rai iha faze ida ne’e,” nia kompara.

Nia hatutan, ligasaun entre papel mídia estadu liga ho konstrusaun estadu maka media iha nia papel importante atu ajuda prosesu konstrusaun estadu hodi la’o iha nia dalan, lao iha faze. Katak, ajuda atu fó informasaun di’ak, ajuda para povu bele sente katak ukun aan ne´e iha folin (valór).

Lider másimu TATOLI, IP haklaken mós katak teknolojia no nia progresu ne´e foun ba sosiedade timoroan sira. “Ha’u bele dehan númeru ki’ik liu husi ita sira ne’e mak uza instragram no twitter, atu dehan saida, iha ema, teknolojia sira hanesan ne’e, bele sai fali risku, se la iha informasaun sira ne’ebé loloos no kredivel ba ita-nia rai no media estadu sira asume responsabilidade ida ne’e”.

“Lee informasaun iha twitter, instagram no facebook dala ruma halo ita atrapalla bo’ot mas kuandu ita lee jornál, akompaña notísia RTTL, lee notisia iha TATOLI, ita foin kompriende, ne’e katak media sira-nia papel sira importante atu informa buat ne’ebé loloos,” dehan Prezidente TATOLI, IP, José da Costa.

Se media la iha, tuir Prezidente TATOLI, susar ita atu akompaña informasaun ne´ebé loloos. Enkuantu, media ne´ebé kredivel sei hala´o papel ne´ebé loloos hodi kontribui ba dezenvolvimentu nasionál.

“Oinsá media estadu kontribui, oinsá era teknologia agora bele influénsia no oinsá akademika sira bele kontribui no oinsá parte sira hotu bele kontribui ba dezenvolvimentu nasionál iha ita-nia rai ne’e,” nia konsidera.

Entretantu partisipa iha semináriu nasionál ne´e mak estudante no akadémiku sira tomak iha UNITAL.

Ajénsia TATOLI.IP nu’udar ajénsia ofisiál estadu Timor-Leste nian. Ezisténsia Ajénsia TATOLI.IP mai husi inisiativa Sekretáriu Estadu Komunikasaun Sosiál (SEKOMS), iha 2012-2017.

TATOLI.IP nu’udar transformasaun husi ETNA (East Timor News Agency), ne’ebé depois nakfila ba ANTIL (Ajénsia Notisioza Timor-Leste). Ajénsia estadu ne’e hetan aprovasaun iha Konsellu-ministru no públika iha Jornál Repúblika iha loron 14 marsu 2016, nu’udar embriaun ho naran ANTIL.

ANTIL ne’e lansa husi Primeiru-ministru, Rui Maria de Araújo, iha loron 27 juñu 2016. Iha marsu 2017, Konsellu-ministru aprova ANTIL sai TATOLI, nu’udar ajénsia ofisiál estadu Timor-Leste nian no publika iha Jornál Repúblika. TATOLI ho nia estatutu rasik nu’udar Institutu Públiku (IP).

Objetivu primeiru estabelese ajénsia estadu Timor-Leste mak sai fontes informasaun ofisiál estadu Timor-Leste ne’ebé iha kapasidade no kbiit elabora produtu informasaun no notísia ne’ebé nesesita husi públiku utilizadór informasaun iha eskala nasionál, rejionál no internasionál.

Segundu mak nu’udar implementadór konstituisaun ne’ebé sai dever governu nian atu fó servisu oferesimentu informasaun ne’ebé kredivel no loos nomós sai direitu informasaun sosiedade Timor-Leste ne’ebé ne’ebé garantidu husi artigu 40 no 41 konstituisaun Timor-Leste nian.

Terseiru mak nu’udar instituisaun komunikasaun informasaun, Ajénsia TATOLI.IP la’ós de’it sai produtór informasaun maibé mós bele iha papel nu’udar “National information clearing house” ne’ebé iha tarefa fó klarifikasaun no informasaun serteza, halakon misinformasaun no disinformasaun. Bele sai nu’udar “área istória” no “eskritór istória” pátria, nasaun, sosiedade nomós nu’udar “maklibur no fornesedór informasaun públiku”.

Kuartu mak halo ajénsia notisioza TATOLI.IP nu’udar padraun minimál kompeténsia jornalístika ba jornalista Timor-Leste ne’ebé sempre bele produz produtu informasaun-kareira jornalístika ne’ebé iha kualidade tuir dinámika sosiál no nesesidade informasaun sosiedade nian.

“Fenómena no dinámika sosiál” ne’ebé “dinámika komunikasaun” ne’ebé estimula ho dezenvolvimentu teknolojia komunikasaun-informasaun lori konsekuénsia iha Timor-Leste ho paradigma  nesesidade informasaun públiku iha ne’ebé TATOLI nu’udar ajénsia notísia nasionál Timor-Leste ne’ebé la’ós de’it ezije atu bele fornese pakote informasaun iha kontextu “mainstream” maibé iha futuru bele mós obrigadu produz informasaun alternativa ho karakter “taylor made” ne’ebé propoen husi utilizadór informasaun determinada.

TATOLI nu’udar ajénsia notísia Timor-Leste ho karakter multikanál, multimedia, multiplataforma no multitarefa ne’ebé bele mós dezenvolvidu no iha funsaun nu’udar sentru produsaun filme no dokumentasaun nasaun, sentru opiniaun públiku nomós fórum informasaun públiku, sentru jestaun arkivu no dokumentu nasaun nomós sentru edukasaun-formasaun peskiza no dezenvolvimentu komunikasaun aplikada.

Funsaun oioin, papel, abilidade no feramenta komunikasaun institusionál ajénsia notisioza ne’e iha nia tempu bele fontes konsumu ba ajénsia notisioza ne’ebé posibilita ajénsia notísia Timor-Leste ne’e moris, krexe no dezenvolve nu’udar instituisaun komunikasaun ho karakter “income generate” (bele rezulta konsumidór) no la bebeik nu’udar “cost center” (sai pezu finanseiru).

TATOLI.IP nu’udar ajénsia notísia nasionál Timor-Leste ne’ebé moris, krexe, ne’ebé dezenvolve ho jestaun ne’ebé profisionál, apoiadu husi rekursu umanu ne’ebé kompetente ho apoiu saláriu minimál ne’ebé sufisiente no ho apresia kompeténsia no kapasidade nia jornalista sira halo bele sai “modelu” no “padraun indústria komunikasaun-informasaun no prátika jornalístika” futuru ne’ebé ho kualidade-dignidade nu’udar inventáriu nasionál Timor-Leste.

VIZAUN NO MISAUN TATOLI,IP

Vizaun

Sai “Trend-setter” fontes notísia no informasaun nasionál ne´ebé iha kualidade, kredível no nesesitadu husi públiku utilizadór informasaun.

Misaun

  1. Fornese produtu notísia ne´ebé mak públiku utilizadór informasaun jeralmente.
  2. Atende nesesidade informasaun públiku utilizadór informasaun ne´ebé mak ho karaktér antesedente, indepth, klasifikadu no “taylor-made information” no “self users assigment”
  3. Sai produtór no jestór informasaun no dokumentasaun nasaun.
  4. Sai produtór filme no dokumentasaun nasaun.
  5. Sai organizadora funsaun “information clearing house”.
  6. Sai instituisaun opiniaun públiku
  7. Hala´o funsaun instituisaun peskiza no dezenvolvimentu komunikasaun aplikada
  8. Sai “state public relations”
  9. “State agent of information”
  10. “Flag carrier” Timor-Leste nian
  11. Realizadór fórum informasaun públiku

NORMA JERÁL SIRA

Servisu ajénsia notísioza TATOLI.IP nian mak bazea ba nia natureza no karakterístika; rapidez no rigór. Notísia TATOLI.IP nian tenke sai “notísia dahuluk” antes órgaun komunikasaun seluk. Notísia TATOLI.IP nian rapidez ka lais liu maibé labele ignora nia rigoroza hanesan akurasia, rigór, indepedente, inzenta, klareza no nafatin iha integridade nomós kredibilidade.

Akurasia

Notísia TATOLI.IP tenke sempre garante nia kualidade téknika no konteúdu iha aspetu akurasia. Notísia sira hotu tenke iha verifikasaun ba faktus, dadus no kronolojia inklui deklarasaun sira husi fontes informasaun hotu ne’ebé envolve iha produtu notísia TATOLI.IP nian molok halo publikasaun hodi sai ba konsumu publiku. Tanba ne’e, notísia sira, teknikamente tenke hakerek ho loloos no akuradu nomós lójika husi konteúdu notísia ida iha impaktu direta no indireta iha sosiedade ka konsumidór Ajénsia TATOLI.IP nian.

Rigór

Natureza notísia hotu ne’ebé publikadu husi TATOLI. IP tenke rigór. Katak, notísia sira verifikadu, analizadu, kredivel, fortifikadu la’ós de’it ho deklarasaun eh esplikasaun fontes informasaun nian maibé kumpleta mós ho dadus no faktus inklui indikadór sira ne’ebé bele rezulta impaktu ida. Rigór em termos de tékniku nomós konteúdu hodi asegura liután kredibilidade no integridade.

 Independente

Ajénsia TATOLI.IP hala’o nia kna’ar ho indepedente no hado’ok aan husi bias, tuir prinsípiu universál jornalizmu nian nomós kódigu deontolójiku. Tanba ne’e, profisionál TATOLI.IP sira nian evita no “hakribi” promosaun ba interese individu, grupu eh organizasaun. Indepedénsia nu’udar reputasaun Ajénsia TATOLI.IP nian.

 Izenta

Jornalista no editór prodús notísia ba Ajénsia TATOLI.IP tenke ejizidu no iha inzensaun. Tanba ne’e fatór determinante ba rezulta produsaun notísia ho inzenta mak profisionál TATOLI.IP nian, maka formulasaun pergunta, planu kobertura tenke rigór no iha objetividade, inklui interpreta ho onestidade.

Klareza

Notísia TATOLI.IP nian tenke elabora ho klaru, to’o iha finalidade ida no meresidu hodi halo publikasaun. Signifika, notísia hotu ne’ebé TATOLI publika kumpre ona regra teknikamente, substansialmente no la kria hela konfuzaun ba públiku.

 Integridade

Profisionál TATOLI.IP nian tenke haloko no hanai kódigu deontolójiku, ho onestidade, no kredível, hodi manten nia integridade ba promove interese públiku no estadu nian.

Jornalista no editór sira tenke demonstra espiritu responsabilidade, sentidu pertense no komprometidu, hatudu reputasaun di’ak nu’udar profisionál, iha ne’ebé no bainhira de’it hodi kontinua mantein integridade profisionál nomós institusionál.

KOMPONENTE NOTÍSIA TATOLI.IP

Notísia Ajénsia TATOLI.IP la’ós de’it atu informa maibé eduka públiku, haree ba audiénsia, alvu no karaker audiénsia sira nian. Iha prosesu redasaun notísia ba TATOLI la’ós repetidu maibé diretamente ba nia konteúdu loloos saida mak atu fó sai ba públiku sira.

Notísia importante (hard news) iha TATOLI.IP fahe ba oin tolu; notísia akontesimentu, notísia faktuál no notísia kuotasaun. Notísia sira ne’e tenke badak (inzenta) no rigór.

Komponente notísia TATOLI.IP tenke koresponde ba estrutura ka fórmula 5W+1H no inklui 3E+1N (Empower, Englighting, Encourage) no (Nationalism), pelumenus ida, iha pesa ka produtu notisiáriu TATOLI.IP nian.

Notísia relevante: Ajénsia TATOLI, Lalenok Ida ba Povu

Jornalista : Nelia Fernandes

Editór        : Rafy Belo

HAKEREK NO HATÁN

Please enter your comment!
Please enter your name here