Ministra Edukasaun, Juventude no Desportu, Dulce de Jesus Soares. Imajen/TATOLI

DILI, 11 outubru 2019 (TATOLI)-Ministériu Edukasaun Juventude no Desportu (MEJD) tau ona iha planu no asaun atu hadi’a kondisaun no fasilidade eskola liuliu sala aula hamutuk 2.000 iha territóriu nasionál iha tinan 2020-2023.

Notísia Relevante : Prezidente Repúblika Preokupa Kondisaun Edifísiu EBC Leusari

Ministra Edukasaun Juventude no Desportu, Dulce de Jesus Soares, rekoñese katak eskola barak tebes iha Timor-Leste mak mukit kondisoens infraestrutura no fasilidade. Tanba ne’e, nia hatutan, la’ós eskola ida ka rua de’it mak aat.

Prezidente Repúblika, Francisco Guterres Lú Olo, durante halo vizita ba Munisipiu Lautem haree diretamente Eskola Ensinu Báziku Sentrál Leusari iha Suku  Seralau, Postu Administrativu Lautem iha sala haat (4) ho kondisaun di’ak, no sala hitu (7) ho kondisaun la di’ak no eskola falta kadeira-meza, la iha janela, odamatan no kalén no plafond dodok ona hodi afeta ba prosesu aprendizajen.

“Atu dehan de’it katak, eskola iha Timor-Leste ita sei presiza  sala aula 2000 resin. Tanba nune’e la’ós eskola ida mesak iha Lospalos maka aat, maibé eskola sei rihun resin ita presiza atu konstrui ne’ebé Ministériu Edukasaun sei hein orsamentu bele pasa iha Parlamentu Nasionál,” afirma Ministra Dulce, ohin, hodi responde jornalista iha edifísiu Forsa Navál Estadu Unidu Amerika, iha Dili.

Nia dehan, iha tetu Orsamentu Jerál Estadu (OJE) 2020, MEJD prevee ona orsamentu hodi hateke mós ba futuru. La’ós atu konstrui de’it uma eskola, maibé sei harii eskola, monta ho fasilidade kompletu hanesan, biblioteka, sala profesór no sala aula ba alunu sira no reforsa rekursu profesór sira iha lingua Portugés.

Ministra Dulce mós haruka ona ekipa hodi rekolla dadus eskola sira ne’ebé anin sobu durante anin boot, foin lalais ne’e.

“Ministériu Edukasaun enfrenta mós dezafiu, tanba ita harii infraestrutura edukasaun, maibé dala ruma dezastre naturál mós akontese sobu daudaun uma eskola sira, ida ne’e problema ida ne’ebé sei haree para rezolve tuir orsamentu ne’ebé,” Dulce hateten.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here