Logotipu CO25.

OE-CUSSE, 12 dezembru 2019 (TATOLI)-Komité Orientadór 25 (CO25-siglá portugés) tun ona ba munisípiu sira hodi halo konferénsia CO25 nian hodi rekolla dadus atu hakerek istória rezisténsia nian ho loloos.

Notísia Relevante : CO25 Realiza Konferénsia Molok Hakerek Istória Rezisténsia TL Nian

Prezidente Komité Orentadór 25 (CO25), Constâncio Pinto.

Liuhosi konferénsia CO25 iha Rejiaun Administrativu Espesiál Oe-Cusse Ambeno (RAEOA), ohin, prezidente CO25 Constâncio Pinto, esklarese, hakerek livru rezisténsia ne’e sei foku ba envolvimentu organizasaun juveníl no estudantíl ba libertasaun nasionál, liu-liu iha Oe-Cusse durante invazaun indonézia nian mai to’o tinan 1999.

Konferénsia CO25 ho tema “Hakerek Istória Rezisténsia Timor-Leste nian”, Constâncio Pinto, klarifika liu tan,   dezenvolve hakerek livru sai hanesan istória loloos ba jerasaun sira tuir mai hodi hatene. Basa, durante ne’e ema barak hakerek ona istória, ida-idak konta, no balun la hatene mós konta, tanba ne’e, presiza hakerek istória ida perfeitu no kredivel.

Notísia Relevante : Konferénsia CO25 Atu Introdús Komité ba Públiku

Eis Ministru Komérsiu Indústria no Ambiente iha governasaun da-neen nian  ne’e hateten,  munisípiu ida-idak iha nia istória rasik, tanba ne’e presiza deskobre hodi elabora no hakerek iha livru ida atu bele sai mós hanesan referénsia atu bele hametin espíritu patriotizmu no nasionalizmu iha ema hotu nia fuan.

Constâncio hateten, ema hotu ne’ebé partisipa iha funu ne’ebé sei moris, sira nia espíritu sei forte, maibé ba jerasaun ne’ebé mak sei mai bainhira sira la hatene istória  ho loloos,  sira nia espíritu nasionalizmu ho patriotizmu bele lakon.

Konferénsia CO25 nian iha RAEOA ne’e hanesan ninin no rohan ba konferénsia munisipál, maske nune’e, iha tinan oin, peskizadór CO25 sei tuun hikas ba munisípiu ida-idak atu halo peskiza ida profunda tebetebes.

Sekretária Rejionál ba Turizmu Komunitária RAEOA, Inácia Conceição Teixeira, reprezenta Prezidente RAEOA deklara, prontu  kolabora ho CO25 atu bele hala’o servisu levantamentu dadus no peskiza ba istória Oe-Cusse nian iha luta libertasaun nasionál.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here