Adjunta Sekretária Jerál KO25 no atuál Prezidente CNJTL, Maria Dadi Soares Magno. Imajen Tatoli/Antónia Gusmão

ATAÚRO, 09 dezembru 2019 (TATOLI) – Komité Orientadór 25 (CO25, sigla portugés) realiza konferénsia munisipál molok hakerek istória rezisténsia Timor-Leste (TL) nian.

Adjunta Sekretária Jerál KO25, Maria Dadi Soares Magno, hateten objetivu hosi estabelesimentu Komité Orientadór 25 ne’e maka hakerek livru rezisténsia organizasaun juveníl no estudantíl ba luta libertasaun nasionál.

“KO25 nia meta maka husi hakerek istória ne’e bele transmite ba livru no istória ne’e bele publika no livru ida ne’e rasik sei publika hanesan prezente ida ba jerasaun prezente no jerasaun ba jerasaun”, hateten Adjunta Sekretária Jerál KO25 ne’e ba TATOLI hafoin abertura konferénsia ne’ebé hala’o iha Administrasaun Postu Administrativu Ataúro, ohin.

Atuál Prezidente Konsellu Nasionál Juventude Timor-Leste (CNJTL, sigla portugés) ne’e afirma, konferénsia munisipál ne’e ho objetivu maka sensibiliza vizaun no misaun kona-ba KO25 ne’e rasik nia papél no mós oinsá maka bá oin sei iha kompromisu atendimentu ida entre K025 hamutuk ho Konsellu Veteranu, autoridade lokál sira para indika ema relevante bainhira peskizadór sira tun bá terrenu atu halo entrevista ho grupu alvu sira ne’ebé pertinente tebes atu kontribui ba livru ne’e rasik.

“Espera katak konferensista sira bele iha kompriensaun, bainhira peskizadór sira tun mai sira bele kontribui ona katak sira rasik sente na’in ba istória ne’e. Klaru katak ema ida-idak ho nia jornada istória rasik, ita-nia mehi maka istória ida ne’ebé bele reprezenta sofrimentu terus ho mata-been, sakrifisiu sira ne’ebé maka iha liuliu iha Ataúro rasik hanesan rai ida ne’ebé maka kuaze desterradu sira iha 1980 to’o 1993, ita-nia ema barak mak mai iha ne’e, entaun istória nakukun ne’ebé ita haree katak presiza duni transmite ba sosiedade no joven sira”.

Durante ezisténsia K025 kria ona revista edisaun I, II no livru ida espesiál ba Ataúro ho ninia tópiku Prizaun Nakloke.

Reprezentante Administradór Postu Administrativu Ataúro, Munisípiu Dili, Jesuína Freitas, lori rezidente Ataúro nia naran agradese ba K025 ne’ebé maka hili ona fatin ne’e ba realizasaun konferénsia.

“Nu’udar autoridade apresia no orgullu tanba bele hili Ataúro ba realizasaun konferénsia ida ne’e. Ami iha esperansa tebes tanba fiar katak bá oin istória sira ne’ebé durante ne’e iha liuhosi livru ne’ebé sei hakerek no publika bele ajuda no dezenvolve di’ak liután ba jerasaun atu hatene istória sira ne’ebé durante ne’e iha”, dehan Jesuína katak.

Tanba ne’e, prontu atu koopera ho K025 hanesan fahe informasaun ba xefe suku, xefe aldeia, liuliu sira ne’ebé responsabiliza ba iha istória ne’e rasik.

Antes ne’e, konferénsia refere hala’o uluk ona iha munisípiu hotu, falta Rejiaun Administrativa Espesiál Oe-Cusse Ambeno (RAEOA).

Konferénsia ne’e partisipa hosi veteranu, sobrevivente, joven Ataúro sira, Reprezentante Polísia Nasionál Timor-Leste eskuadra Ataúro, reprezentante FALINTIL-Forsa Defeza Timor-Leste (F-FDTL), Servisu Migrasaun iha Ataúro no abitante sira.

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here