Plaka. Imajen: Nelia Fernandes

DILI, 12 dezembru 2019 (TATOLI)—Diretór Eskola Sekundária Jerál 10 de Dezembro, Domingos Sávio Gusmão, hateten Eskola Ensinu Sekundária Jerál 10 de Dezembro, Comoro, Dili, harii iha loron 2 Marsu 2002.

Diretór Eskola Sekundária Jerál 10 de Dezembro, Domingos Sávio Gusmão. Imajen: Nelia Fernandes

Nia informa, iha momentu ne’ebá, ema na’in rua ho ekipa ne’ebé iha inisiativa harii eskola refere mak primeiru Duarte Brangança no segundu Domingos Sávio Gusmão hamutuk ho ekipa hanesan Pedro da Conceição, Cesaltino Sebastião de Jesus, Carlito da Cruz, Pedro Canisius Alegria, Alfredo Tailelo, hamutuk fó opiniaun ba malu ho inisiativa loke eskola Ensinu Sekundáriu Jerál 10 de Dezembro.

Eskola 10 de Dezembro ne’e, nia hatutan, Pedro Canisius Alegria mak legaliza proposta hatama ba iha Ministériu Edukasaun no proposta eskola refere Ministériu Edukasaun legaliza sai estatutu públiku iha 21 fulan Agostu tinan 2002.

Maibé, tuir nia, iha momentu ne’ebá sira hotu sei hanorin iha Eskola Ensinu Pré-Sekundária no eskola ne’e seidauk tau ninia naran. Momentu ne’e tau eskola Pré-Sekundáriu 02 Comoro (Setembru 1999) hafoin iha 2002 Ministériu Edukasaun [Armindo Maia] haruka eskola hotu tau nia naran ne’ebé istória balun.

Entaun iha momentu ne’ebá, Eskola Pre-Sekundária o2 Comoro tau fali nia naran Eskola Ensinu Pre-Sekundária 10 de Dezembro ho razaun tanba timoroan na’in rua (Dom Carlos Filipe Ximenes Belo no José Ramos Horta) simu Nobel da Paz iha 10 Dezembru 1996.

Iha momentu ne’ebá, tau eskola nia naran ne’e sira diskute katak eskola ne’e tau eskola Nobel da Paz maibé tanba momentu ne’e kolega balun ninia hanoin katak eskola Nobel da Paz ne’e simu iha 10 de Dezembru, tanba ne’e di’ak liu tau naran 10 de Dezembru 1996. Ne’ebé, iha símbolu ida, 10 Dezembru nia logotipu hakerek iha livru oan ida ho emblema nia laran hakerek dia 10 de Dezembru 1996 Nobel da Paz. Tanba ne’e tau eskola nia naran 10 de Dezembro.

Hafoin Eskola Ensinu Pre-Sekundária loos ona, ikus mai komunidade ne’ebé hela iha área Comoro liuliu sira ne’ebé hela besik eskola ninia ezijensia mai eskola katak eskola populasaun husi Dom Aleixo ninia barak, depois eskola ne’e dook, entaun presiza loke tan Eskola Sekundária Públiku ida.

Tanba, tuir komunidade, loke Eskola Sekundária Públiku ida iha Comoro para alunus sira ne’ebé hela besik eskola, sira bele eskola de’it iha ne’e. No, momentu ne’ebá, Eskola Ensinu Pre-Sekundária tau ona naran 10 de Dezembru ne’ebé iha fatin ida de’it entaun entaun sira foti tan 10 de Dezembru sai hanesan naran ba Eskola Sekundária Públika ne’ebé loke iha 2002.

Eskola Nia Naran : Escola Ensinu Sekundária Jerál 10 de Dezembro.

Lokaliza : Iha Comoro, Postu Administrativu Dom Aleixo, Munisípiu Dili.

Harii : Iha loron 02 Marsu 2002.

Inisiadór : Duarte Brangança no Domingos Sávio Gusmão

Fundadór : Duarte Bragança

Totál Profesór/a : Hamutuk na’in 73 (permanente na’in 57, voluntáriu na’in ualu (8), kontratadu husi Ministériu Edukasaun na’in lima (5), sai na’in rua (2) no mate na’in ida.

Totál Estudante : Hamutuk na’in 2021.

Vizaun : Eskola Ensinu Sekundária Jerál 10 Dezembru Comoro-Dili hanesan komunidade edukativu ida atu tulun prosesu formasaun ne’ebé integradu hodi harii morál, kualidade no responsabilidade ho valór aas no mós sai ema ne’ebé iha kapasidade intelektuál adekuadu ba futuru.

Misaun : Forma estudante sira atu sai ema loloos, hanesan sidadaun ne’ebé bele hatene serbi, hatene halo di’ak ba ema seluk, nakloke ba nia-an rasik, hatene moris tuir valór ba rai doben ida ne’e. Tulun estudante sira atu sai ema ne’ebé bele kreativa, onestu, disiplina, independente, serbisu ka estuda hodi bele kompete ho maluk sira seluk nomós ba nasaun seluk. Tulun estudante sira atu kolabora ho nasaun RDTL ba dezenvolvimentu liu husi área kultura, sosiál, ekonomia no asesu ba teknolójía moderna.

Objetivu : Hadi’a edukasaun ne’ebé ho kualidade di’ak ba estudante sira ka foinsa’e sira iha futuru. Prepara rekursu umanus ne’ebé iha kualidade atu partisipa iha prosesu dezenvolvimentu nasionál iha nasaun RDTL.

Sala de Aula : Hamutuk 30 (kompleta ho sala profesór/a iha ida, gabinete diretór iha ida, biblioteka iha ida, casa de banho iha rua).

Konsellu Sira : Eskola refere iha Konsellu Profesór, Konsellu Pais (inan-aman) no Konsellu Estudante.

Fusionáriu ba halo limpeza (Cleaner) : Pesoál limpeza la ida.

Biblioteka : Iha no funsiona ho di’ak.
Rekursu Umanu Sufisiente : Profesór sira ne’ebé hanorin tuir abilitasaun, hanesan iha profesór lisensiadu hotu no maestradu, diploma laiha.

Lia Menon : Ba inan-aman sira, kuandu labarik sira (estudante) ramata Eskola Ensinu Pre-Sekundária atu ba iha Eskola Ensinu Sekundáriu karik, bele lori mai eskola iha Eskola Ensinu Sekundáriu 10 de Dezembro ne’e tanba eskola prepara atu simu ita-nia oan sira bazeia ba sala de aula ne’ebé mak eskola prepara.
Aleinde ne’e, diretór ne’e hameno ba inan-aman sira, kuandu labarik sira iha eskola kuandu problema labele mai fó sala de’it ba mestre sira, kuandu fó sala deit ba profesór sira iha eskola ne’e hanesan ita ko’alia mak barak.

Maibé tuir loloos kuandu ita-nia oan halo problema primeiru ita labele liuhusi ita-nia oan para aumenta fali problema. Ita husu ba ita-nia oan tanba saida mak problema ne’e mosu? Ita tenke husu uluk ba ita-nia oan tanba iha investigasaun ruma depois ita foin bele hatene nia motivu ne’e saida

“Maibé dala barak inan-aman mai, ema investiga la’o hela, mai dala ruma fó sala kedas ba ami profesór/a sira. Hanesan diretór, ha’u hanoin inan-aman nia hanoin hanesan ne’e laduun koopera ho eskola,” nia dehan.

Notísia relevante:Perfil Eskola Sekundária Iha Dili: Eskola Ensinu Sekundária Jerál (EESJ) Cristal (X)

Jornalista : Nelia Fernandes
Editór : Rafy Belo

1 KOMENTÁRIU

  1. Karik bele tau ho eskola nia luan, kondisaun, no ambiente iha fatin ne’e atu nune’e ema ne’ebé nunka ba fatin ne’e bele iha gambaran ruma katak eskola ne’e nia modelu oinsa… sujestaun ba perfil deit… bele foti mos ho mestre sira ne’ebé hela iha eskola ne’e nain hira? Tanba ida ne’e mos tama ba perfil eskola nian hotu ? Alumni hira ona ? Pesoalmente nuudar Alumni sente perfil ne’e sedauk kompletu 😉

HAKEREK NO HATÁN

Please enter your comment!
Please enter your name here