Logotipu Cristal

DILI, 02 dezembru 2019 (TATOLI)—Diretór Eskola Ensinu Sekundária Jerál (EESJ) Cristal, Rafael Sávio, informa Eskola Ensinu Sekundária Jerál Cristal hanesan eskola privada ida ne’ebé harii iha 1975 iha suku Mascarinhas, Balide, Dili ne’ebé hamahan-aan iha São João Bosco nia okos.

Nia hatutan, Eskola Ensinu Sekundária Jerál Cristal ne’e harii husi inisiativa rasik ho intensaun atu ajuda timoroan sira bele asesu ba edukasaun no bele fasilita timoroan sira ho diploma formál iha nivel Ensinu Sekundária.

Inisiativa harii eskola ne’e mai husi Antigu Alunu Dom Bosco na’in 10 ne’e hodi tau hanoin hamutuk atu lori timoroan sira bele hetan ninia direitu iha edukasaun, hodi nune’e ba futuru bele lori rai ida ne’e hetan ninia direitu aitodeterminasaun.

Eskola ne’e rasik iha tempu okupasaun Indonézia hetan ona rekoñesimentu husi Governu Indonézia no iha ambiente ukun rasik-aan nia laran ne’e, hetan ona akreditasaun husi Ministériu Edukasaun Juventude no Desportu.

Naran Eskola: Eskola Ensinu Sekundária Jerál Cristal

Lokaliza: Iha Suku Mascarenhas, Balide, Postu Administrativu Vera Cruz, Munisípiu Dili.

Fundadór: Frederico dos Santos Almeida, Eduardo Tilman, Agustinho dos Santos, Anselmo da Conceição, Jacinto de Almeida, Filipe Garcia, Tito Batista no sira seluk tan.

Totál Profesór sira: Hamutuk na’in 47 (permanente na’in sia (9), kontratu jusi Governu hamutuk na’in 16 no profesór ne’ebé fundasaun rasik mak kontrata hamutuk na’in 21. Husi totál profesór/a 47 ne’e feto 19 no mane 27.

Totál Estudante: Totál estudante hamutuk 1.460 (primeiru ano na’in 472, husi Siénsia Sosiál na’in 560 no Siénsia Teknolojia hamutuk na’in 460.

Vizaun no Misaun: Atu lori juventude timoroan hotu bele iha étika morál hodi nune’e bele tane  aas valór umana atu nune’e bele tulun di’ak liután Estadu no Governu iha prosesu konstrusaun nia laran.

Lema ka Motto: Hamutuk sai ida de’it. Signifika, ida ba sanulu no sanulu ba ida.

Objetivu: Tane aas valór nasionalizmu no patriotizmu liuhusi dalan edukasaun atu nune’e bele lori jerasaun foun sira hetan sira-nia futuru ida ho loloos.

Fasilidade: Eskola Ensinu Sekundária Cristal iha sala de aulas hamutuk 24 ne’ebé fahe ba parte dadeer 12 turnu no lokoraik 12 turnu.

Laboratóriu: Iha laboratóriu kona-ba Fizika no Kímika nian buat hotu kompletu no sufisiente.

Biblioteka: Biblioteka iha modelu rua maka Biblioteka Manuál no Biblioteka Dijital Online. Fasilidade livru sira kada tinan ofrese husi Ministériu Edukasaun no inklui mòs fundasaun rasik. Razaun harii biblioteka online ne’e atu ajuda estudante sira iha prosesu peskiza inklui mòs atu minimiza difikuldade ruma kona-ba livru sira.

Pesoál Seguransa: Hamutuk na’in lima (5) no pesoál limpeza na’in 12. Sira ne’e funadasun mak rekruta no saláriu ne’ebé sira simu tuir salariu mínimu $150.

Regulamentu ba profesór/a no estudante sira: Iha Eskola Ensinu Sekundária Jerál Cristal ne’e kategoria ba estatutu profesór sira nian iha rua. Profesór funsionáriu públiku, Ministériu Edukasaun mak responsalbliza no profesór kontratadu fundasaun maka toma konta.

Nune’e mós ba profesór sira ne’ebé mak la kumpre sira-nia dever laiha justifikasaun ka abandona estudante sira, direitu dirijentis eskolar sei foti medidas tuir regras ne’ebé iha. Ba estudante sira, parte eskola bandu la hemu tua iha areadores eskola. Kuandu estudante ida mak la kumpre sei hetan sansaun.

Konsellu profesór: Kada profesór tenke responsabiliza ba ida-idak nia matéria (disiplina ida-ida), Binhira iha informasaun ruma ne’ebé importante diretòr sei informa iha enkontru konsellu profesór.

Konsellu estudante: Ninia funsaun mak tulun atividade eskola nian hanesan programa extra-kurríkulár. Sira mós bele organiza eventu ruma maibé hetan koñesimentu husi profesór ida ne’ebé tutela depois mak informa ba diretór eskola.

Diretór Rafael, informa husi 100% estudante ne’ebé akaba sira-nia estudu iha Cristal barak mak kontinua iha UNTL no balun kontinua ba rai li´ur. Husi rekursu ne’ebé mak eskola ne’e forma, oras ne’e daudaun balun serbisu iha instituisaun Governu, balun sai deputadu, Polísia no F-FDTL inklui iha ajensia sira.

Entertantu, husi rekursu ne’ebé iha, balun akaba ona estudu iha universidade no hetan ona dotoramentu inklui maestradu iha ‘area lubuk ida.

Notísia relevante:Perfil Eskola Ensinu Sekundáriu Iha Dili: ESTV-Grupu Teknolojia Indústria Becora (IX)

Jornalista: Tomé Amado

Editór      : Rafy Belo

HAKEREK NO HATÁN

Please enter your comment!
Please enter your name here