Xefe Departamentu Pekuária no Veterinária, Zito Guimarães. Imajen/TATOLI.

LAUTEM, 12 dezembru 2019 (TATOLI) – Bailoro naruk afeta karau-timur no vaka hamutuk 165 maka mate iha Munisípiu Lautem.

“Ita haree bailoro naruk afeta duni karau 165 maka mate ona tanba bee menus no hahán laiha”, Xefe Departamentu Pekuária no Veternária, Zito Guimarães, ba Ajénsia TATOLI, kinta ne’e.

Nia informa katak hahú hosi setembru to’o dezembru karau-timur no vaka hamutuk 165 maka mate no balun mate iha kolam-laran, tanba tahu barak.

Munisípiu Lautem iha Postu Administrativu lima, maka Lautem iha karau hitu mate ona, Lospalos hamutuk 46, Iliomar 69 no Luro hamutuk 43, enkuantu Tutuala seidauk hatama relatóriu.

Animál hirak ne’e mate tanba kauza hosi bailoro naruk, hahan menus iha fatin hotu hodi rezulta karau balun mate tanba kondisaun saúde la aguenta moris.

Nia salienta katak parte relevante fó tratamentu liuhosi vasinasaun ba karau sira, maibé sona ho antibiótika hodi halo prevensaun ba moras de’it, más bainhira bee menus no laiha hahán, ida ne’e karau nia na’in sira maka tenke esforsu atu karau sira bele hemu ka han.

“Ami husu karau na’in sira tenke kontinua asegura karau tanba bele afeta ekonomia”, katak.

Antes ne’e, Xefe Suku Parlamentu, Ângelo Calvão Silva, ba Ajénsia TATOLI, foin lais katak bailoro naruk iha tinan ne’e, halo bee menus no duut-maran ne’ebé afeta karau 20 mate.

Bailoro Naruk Afeta Karau 20 Mate iha Suku Parlamentu

Jornalista: Florencio Miranda Ximenes
Editora : Maria Auxiliadora

HAKEREK NO HATÁN

Please enter your comment!
Please enter your name here